Ningtawn Ai Share Shagan

Myitrum manang ni, “ Ningtawn Ai Share Shagan ” ngu ai teng byin ai mabyin langai ka shagun dat ai re yaw. Marang n htu ai sha, Jan mai ai daini hte rai yang nhtoi 20 ya rai sai. LZ hpe M ni nbungli hte bom jahkrat bun na nga ai shiga mung n na sai: LZ grup-yin majan shiga mung n na ai. M ni akatsi zim rai gyem mat sam sai. Kade gasat tim myit ai kaw n du hkraw nna hpa baw zai ladat bai shaw mayu ai kun? Shing n rai, kaga manghkang grai law ai majaw kun i. Hpa mi rai rai Awmdawm a matu kyu matut hpyi ga. Shawnglam Share Ninghkring ni a matu kyu hpyi nga ga yaw. JIC++ _______________________________ Ningtawn Ai Share Shagan Zinhtung Naw Awng Ndai sumla hpe jawm yu yu ga. Majan gasat laram nna, Kasi yu la mai ai; manu dan Myutsaw Shanglawt Hpyenla Zinhtung Naw Awng rai nga ai. Lai wa sai 2011 November 3 ya shani, Sammung Munggu, Manjak Kahtawng makau na gasat poi hta, Hpyenma Zinhtung Naw Awng gaw, shi langai chyu sha htim lung wa ai Tai hpyen law law hpe hkap ninghkap gasat taw nga ai. Tai ni law law shi a pala hte si jawng ma sai. Tai ni gaw hpung hte hpung matut manoi htim lung tik tik, Zinhtung Naw Awng mung ninghkap gap tik tik rai nga yang, Pala tsep kawp ma mat sai. Tai ni gaw matut nna htim lung wa ma yang, Hpyen a lata hte zingri zingrat hkrum nna n kam si ai; Magrau grang Myutsaw Shanglawt Hpyenla Zinhtung Naw Awng gaw, hpang jahtum ngam ai shi a pala langai hte shi a asak hpe dan la nna, Amyu hte Mungdan a matu gwi gwi sak jaw ap nawng mat wa sai. Shaloi shi hpang maga na sinat mahku n ngoi sai re majaw, Tai ni aloi sha htim lung wa ma yang, shi hkrai gap si mat ai; Zinhtung Naw Awng a moimang hpe wa mu na masai. Shaloi, “ Aga! share shagan KIA hpyenma ndai shi langai chyu she re hka! Ndai wa shi a pala n ma mat ai rai yang, anhte kade she naw si na! Mauhpa magrau grang ai; Kasi yu la hpa KIA hpyenla” ngu jawm tsun shakawn let hpyenla shada hkungga jaw na masai ngu shingran ai. Shi gaw Sammung, Munggu, Gawnsam Kahtawng na Kawa Zinhtung La Gawng hte Kanu Myitung Hkawn Shawng yan a kasha rai nga ai. Shi a shangai nhtoi gaw, 1988 December 21 re. Ndai dinghku majan kaba hta, ndai hpyenma Zinhtung Naw Awng zawn, tawk hprut masin hte Amyu hte Mungdan a matu, gwi gwi tinang a Asak hpe sak jaw ap nawng mat wa ai magrau grang Myu tsaw Shanglawt Hpyenla kaga kade naw nga ai kun? Anhte a labau hta matsing sumhting da ra ga ai. Masat dingsat nlung shadaw jun da nna, “ Ningtawn Ai Share shagan “ ngu, masat tawn nhtawm, Wunpawng amyu a arawng sadang hpe shadan shdawng hkungga da ra ga ai. Htawm na anhte a kashu kasha ni yu n-gun la hpa labau lara ngam da ra ga ai. Malap kau n mai tut nawng tsun hkai nga ra ga ai. Daini laning mi ladu hkrum sai; Shi a masat dingsat nhtoi hte shawnglam majan pa e asak ap nawng mat wa sai Share Shagan ni yawng hpe myit dum let, manit mi zim hkungga jaw ga law. Shanglawt Tsing (3.11.2012,4:00AM)