Shim Lam N Mu

Myitrum manang ni, “Shim Lam N Mu” ngu ai Ga shagawp re yaw. Daini tsadan wa gaw, hpyen shalun sumpum jahkrit shama masu da nna, kahtet majan shazim, mare kaba de katsi majan she bai htim nga masai oi. Numsha ni pyi, baw machyi yang shakap ai baw plaster hpe tinang hkum shan kaw set di kadoi la nna shakap da nhtawm, madang tsaw dik ai hku she nanghpam tsi mawan hpe lang nga masai da e…… Plaster shakap chye ai shara ni gaw, baw na shagalawp hte numhkrang kaw re nga ma ai. Manu grai hkyam sa ai hte mari la mai ai da. Mogaung, MKA shinggan tsi seng hkan nanghpam tsi mawan hpe kadai n rim ai; wanglu wanglang mari la mai ai lam chye lu ai. Kahtet majan a matu akyu hpyi ai zawn, Katsi majan a matu mung akyu hpyi dum ga lu oi. Daini tsadan gaw amyu shamyit masing jahkrat tawn da ai hte maren, den nga sai ga re.
JIC++++
Shim Lam N Mu

Myushayi myu a ningli,
Shim lam n mu gin n di;
Moi na nat jaw prat hta grau,
Tsaban 21 nau nan hpyau.

Mare kaba nanghpam lusha,
Hkawn ram ni hta grau chyam bra;
Manu hkyamsa ladat shaw,
Lau bri lau hpam “ Sai” lam baw.

Lau lu lau sha lau si mat,
Myu a ningli yawng hkra tat;
Katsi majan kaba rai,
Lau she hkan je la ra sai.

Hpyen-yen shayi ni hpan mi,
Jamjau jam hkau gin n di;
Miwa la ni sa hpyi la,
Hkungran poi mung galaw da.

Kau mi gunjang jang sha hkawm,
Miwaga de hkrai hkyawm hkyawm;
Hkalem hkalau dut sha kau,
Miwa la ni grai n rau.

Hpaji lam hta mung dumhprut,
Kyang lailen mung hten za shut;
Matsat shabat ana kap,
Makam masham mung ninghkap.

Daini Wunpawng Myu Shayi,
Shim lam n mu aten ni;
Myusha lam-yan grai nan hkra,
Myusha hku nan makawp da; ahkyak la ra sai lu e……..

Shanglawt Tsing

(28.11.2012,1:00AM)