Tsawra ai Na Kawng Hpyen Koi Yen Dabang,

Shawng ningnan Hpan Wa Ningsang, Karai a amying gang nanhte yawng ngwi pyaw nga myit ga ngu ngai (Ap Nawng Daw Jau Ma) shakram dat nngai law. Ningshung ta shang Mangai numri ni grup grup yin yin hta pyen hkawm nga ten, ngai nanhte yawng hpe dum nga nngai yaw. Aten ni mung Nshawn Hka shi zawn (Na Kawng Hpyen Yen Dabang Makau na Hka Shi) sha lwi mat wa nga ai. Na Kawng Dabang e… nang hte n hkrum ai pyi grai nan na mat sa hka! Na a shingnip shingna gaw nye a myi kata na galoi n le mat, galoi mung a nga nga ai. Ngai nang hpe aten shagu akyu hpyi let dum marit nga nngai. Nye a myi pwi hpe Karai Kasang mu chye ya yang gaw an lahkawng kalang mi bai hkrum zup lu na hpe mung kam nga nngai oi. Ya anhte Myikyina mare hta Ja Mam ni htoi gabrim myin tsawm nga ten, ngai nanhte hpe grau myit dum nga nngai yaw. Aw.. .. nanhte mung mam hkai kau da ai laning mi jan na mat sai i…? Nanhte a Ja Mam ni mung gara hku myin tsawm nga na kun ngu nanhte mung myit nga na sai. Hpa hkum sang yaw… Karai Kasang gaw anhte ni yawng a matu jet ai grin ai Ja Mam ni sumsing lamu hta dan la shu la lu na matu lajang ya nga sai. Jinghpaw Wunpawng Nawng Nang Chyum Hkawlik Jawng ma ni mahkawn hkawn shagu, ngai gaw Na Kawng Dabang kaw Karai Kasang hpe nhkring nsa mahkawn shakawn ai nsen ni hpe sha dum nga nngai. Ma ni mung shana shagu Myi Prawt wan n lu tim… Wan shadaw hte sha ningsin hta Karai Kasang hpe shakawn ai,…. Nu wa ni mung nsi note ni nchye yu, nchye hti tim shakut let nawku dawjau ai lamang kaw Choir hte Karai Kasang hpe mahkawn shakawn wa sai i……. Grau nna Ramma ni a Ginhtawng Music hpaji sharin ai sharin gawk hpe grau dum nngai yaw. Ramma ni hte nam mali kata hta music sharin ai hpe ngai myit dum dat shagu myi pwi pru ai. Aww.. anhte Wunpawng Myu shi ni.. Nam mali kata hta she hpaji hpe sharin la wa ra ai i? Ma ni e.. nanhte yawng mung sharin da sai “Tara Kanu shi” hpe matsing nga na re ngu kam ai. Myit kata kaw Matsing da ai hte sha nmai ai yaw.. Tatut sak hkrung lam hta galoi mung jai lang ra ai lam ni re yaw. “Na nnu yang n wa hpe hkungga lara di u” nga ai hpe hkum malap kau yaw, dai kaw tsun da ai hte maren hkan nang u yaw… ma ni e…. Ma ni….. nanhte a lata lamyin ni mung grai bai galu nga na sai i? ah nu ah wa ni hpe zen kau shangun yaw.. Lamyin galu yang ana ahkya kap chye ai yaw. Hkam kaja ai ma ni tai ra ai yaw. Hkam kaja yang she amyu hte mungdan hpe atsawm sha maiggan ni a hpyen hta na makawp maga lu na re yaw. Nanhte ngai (Sara) hpe dum ai majaw hkrap let bai hkrum na hpe la nga ai nga ai shiga hpe na lu ai majaw; ngai grai myit n pyaw ai, grai ma gabu ai. Anhte kalang mi gaw bai hkrum zup lu na re yaw. Myit shaja dating da ga le…. Ah Ji, Ah Dwi ni mung lata lamyin ni grai bai galu nga na sai. Ah Ji Ah Dwi ni e… ma ni hpe zen kau shangun yaw. Hkam kaja yang she tinang a kashu kasha ni hpe shaman ga law law lu tsun na rai nga ai. Ah Dwi nkau mi ngai hpe naw myit dum nga ai nga shiga hpe na chye lu ai majaw mung grai kabu ai, grai hkam sha ai. Bai hkrum zup lu na matu mung ja ja wa ahkyu hpyi nga u yaw. Ngai Ah Ji Ah Dwi ni hte ma ni yawng a Lamyin ni kalang mi bai zen ya mayu nga nngai le. Nshung Mangai ta hta Manang ni chyeju dum poi ni hpe galaw nga ai ten ngai nanhte hpe nachying wa dum nga nngai law. U Wa Yam Nga Nai Mam ni nlu sak jaw ai sha chyeju dum poi galaw nga na re ngu shadu ai. Karai Kasang gaw Myit Masin hkungga hpe yu ai Karai re. Nanhte U Wa Yam Nga Nai Mam ni nlu sak jaw ai majaw hkum yawn, hkum myit sang yaw, Karai Kasang gaw nanhte a myit masin hpe she yu nga ai, nanhte a kraw madai ai nsen hte nanhte a myit masin hkungga gaw shi a shawng hta manam pyaw ai hkungga rai nga na sai. Karai Kasang gaw nanhte hte galoi mung rau nga let shaman ya nga na re yaw. Ngai nanhte hpe dum ai lam, nanhte hte rau nga ai ten ni a lam hpe shagawp ga nga yang ndang ma na nhten, laika pa hta sha gaw n shang mat na nhten, nye a myit dum ai lam gaw ndang tsun hkra rai nga sai yaw. Nye a marit shamai shagun laika hpe ndai gasi hte hpumdim mayu nngai…. “Ahkyu Hpyi ai lam hta mung matut na dating nga ga yaw,.. Makam hkum shayawm kau yaw,.. Yesu Hkristu a myi man hpe sha azi yu let matut na shakut hkawm sa nga ga yaw,… Ngai mung du wa na; Yesu Hkristu mungkan ga de yu wa ai shata; December shata hta nanhte hte bai hkrum lu na matu ja ja wa ahkyu hpyi nga nngai yaw. Nanhte yawng a ntsa anhte kam sham nawku nga ai ahkrung nga ai Karai Kasang tut e bau sin lanu lahku nga u ga ngu,…” Bai hkrum lu na ten hpe myit mada nga let, Saulang Ting Ying Stingying@gmail.com KTC, NN 15.11.2012 ( Na Kawng Hpyen Koi Yen Dabang gaw Miwa Gumsan Mung, Shwe Li, Nawng Tawng kaw nna Minute 30 dang naw sa ra ai shara, Miwa Gumsan Mung hte Jinghpaw Mung Jarik makau Nam Mali kata kaw de da ai dabang re. Masa lam amyu myu a majaw daini dai Na Kawng Dabang kaw shanu nga ai hpyen yen Jinghpaw Wunpawng Myu sha ni Jinghpaw mung hkran de bai htawt nga mat sai re.)