Nawng E Hku Chyeju Dum Poi,

            Myitrum manang ni, “Nawng E Hku Chyeju Dum Poi,” ngu ai Ga shagawp re yaw. Ndai shata gaw, Chyeju dum shata rai nga ai hte maren, lai wa sai bat kaw na Hpyen-yen ni shawng chyeju dum poi ni lang hte lang, dabang hte dabang galaw nga masai. Daini gaw, KIO Ningbaw kaba hte CS wa shanu nga ai; Nawng E Hku Buga Hpung a chyeju dum poi kaba re. Buga de myit dum shingran dat yu ga. Kabu gara let, hpyen-yen ni hte Nlung nnan jawm lu jawm sha na matu, marai 2000 a mahkau lahpaw hte shat gada da ga ai le. Majan shiga gaw kazik pyi n kam kazik mat saga ai. Chyeju shakawn she ahkyak saga ai oi.

                                                          JIC

Nawng E Hku Chyeju Dum Poi

Chyeju dum lam rai n tsun,
Buga shachyen ga mi lun;

KBC a Ginwang langai,
Iya Sama Ginwang rai.

Buga Hpung yawng hkun masum,
Manga sha mi ngam di hkrum;

Nawng E Hku Buga Jan Mai,
Ziun, Mada, Jaw ni rai.

18 gaw hpyen yen ra,
Tinang Buga kau tawn da;

Iya labau I nan ka,
Mungmasa jawm shachyaw na.

Daini Nawng E Hku Buga,
Hpung woi wa Gumtsan Naw Ra;

Buga hpyen-yen Hpungtau sanit,
Magam tau galoi n yit;

Magam gun marai manga,
Tengman Mungga tsun shaga;

Sasana jawng hpaw tawn da,
Sama Nawng E Hku Buga;

Awng dang ai Ma Shapan Jawng,
Alak mi she mying gumhkawng.

Buga Hpung masha shagu,
Shakut shaja lawm mayu;

Nu Num ni mung myit mang rum,
Kyu hpyi lam hta grai myit hkrum;

Ningbaw K’ba hte CS wa,
Nawng E Hku Buga masha;

Makam masham kasi tai,
Ramma ni grai yu la mai.

Goi! Ya daini; ;
Mali sumhka ninghtoi kaja,
Iya chyeju dum poi wa;

Majan hkat ten zawn n rai,
Chyeju shakawn ahkyak ai.

Wunpawng htunghking Nlung nnan,
Nat Jaw Prat e tsun sum-yan;

Ya gaw chyeju dum poi da,
Karai chyeju chye na sa.

Maning mung ndai aten,
Ninghtoi loi pyi n sharen;

Karai chyeju hpe jawm hti,
Hti n dang ai chyeju ni;

Wunli lu wundan tu,
Karai chyeju hpe mahkyu;

Shakawn Kungdawn nsen hkrai,
Yawng a myiman mani sai;

Ahkum gaman kadai n dawng,
Shaning tup chyeju mahkawng;

Alu sumbu hpaw di nak,
Chyeju dum ai mahkra sak;

Nlung nnan shat makai,
Htunghking ndai n mai lai;

Chyeju shakawn jawm lu sha,
Karai Sharawng awng Buga……………..

Shanglawt Tsing

(24.11.2012,1:00AM)