Laiza chyeju dum poi

Myitrum manang ni, mani gaw Laiza Buga Hpung a chyeju dum poi re. Daini, “ Laiza Chyeju Dum Poi” Ga shagawp shagun dat ai. Buga masha ni hte Hpyen-yen ni Unawng Uwa chyeju shakawn shata hpe hkrang shapraw ma ai. Shawa masha grai law ai majaw, n dang daw sha ga ai.Chyeju dum magun lit 151 rai nna, Sak jaw ai chyeju dum Alu hkungga ni yawng hpe, Shawnglam Share Ninghkring ni a lusha matu jaw bang ya na re lam shiga na lu ai. Alu kade re ai hpe bai shana wa na yaw. Chyeju shakawn ga i.
JIC
Laiza Chyeju Dum poi

Goi law aw-! daini gaw,

Chyeju dum poi ninghtoi gu,

Htang myit yu yang grai kabu;

I majan kaba tsin-yam,

Ru yak kyin dut gaja nyam;

Lahkawng ning ngu na aten,

Chyeju dum poi mung dingren;

Nu Wa Hpung woi myit dating ,

Myit rawt jasu woi shading;

Chyeju n dum n nga lu,

Mara lu na zawn she ngu.

Maning yinam shang kaw na,

Tai hte majan hkat ai wa;

Yak hkak jam jau tsun n dang,

Lanam Zindam htu marang ;

Ya gaw lanam hkying ten lai,

Shimari marang teng sha wai;

Nshung sama pyi she mawng;

Karai chyeju grai gumhkawng;

N dang hti ai chyeju wa,

N shakawn yang n mai na.

Dai majaw le – e,

Daini Laiza Buga,

Chyeju dum poi kaba;

Hpung masha yawng hkra hkyawm,

Hpyen-yen ni mung lawm.

Majan nhpan a majaw,

Yi Sun hkauna n galaw;

Shu la nai mam n nga tim,

Chyeju dum ai myit n zim;

Lai sai shaning law law hta ,

Hkam la chyeju hti shaja ;

Ya mung Mana muk hte bau,

Karai chyeju grai she mau;

Wu wu di di chyeju dum,

Tsadan wa pyi myiman sum;she- rai mat wa sai le.

Oh! Tsawra hkawp hpunau ni,

Htet dat mayu ga hkaw mi;

Matsing sumhting da ga yaw,

Grau ahkyak ten du sai law;

Tsadan Wa hkalem hkalau,

Lapran sumprat hte chyinglau;

Hpa-awn ni myit n hten ga,

Mungmasha shadaw shaja;

Annau ni makyit langai,

Shabawn langai sha mi tai;

Amyit amang rau sha rum,

N-gup aga rau jahkrum;

Wari singgat rau sha lwi;

Shawanang hkachyi rau sha chywi;

Shada rau lata gindun,

Tsawra myit hkak hkak madun;

Tsadan wa n dang lu hkra,

Nbung katsi n shang u ga;

Padang Hkrun Lam Majan masing,

Awng Dang Ai Chyeju Shaning ;

Htaning na chyeju dum poi;

Majan hkoi mat nu ga oi……

Shanglawt tsing

(25.11.2012,12:40AM)

¬ 26.11.2012 ya shani shapoi ai re.