MYEN A LATA GA LAHTUM NHKRA AI 101

Myen atsu ya gaw shi grai chye dum kung dum nna amyu wunpawng sha ni a ntsa n gun la ba the gamyep dip nna, amyu shamat lu hkra shani shana shakut taw nga tim, sak n hkrung ai wutdaw hpe kam sham nga ai ni gaw,sak hkrung ai Karai Karai Kasang hpe kamsham ai Wunpawng sha ni hpe amyu shamat amyu jahtum kau na malai, Karai Kasang a chyeju a majaw grau grau law htam wa nga ga ai hpe adan aleng mu lu nga ai.

Sara kaba Yudadan (Judson) a sa sana 200 ning hpring poi hta kaga amyu ni tak ai gaw Kachin ni hpe myen atsu ya e gasat agrawp hkrum, roi rip hkrum let hpyen hprawng hprawng nga ai majaw, ndai poi de nau nlu sa na masai ngu shadu ma ai. Kaja wa poi du ai shaloi gaw kaga amyu baw sang ni hta Kachin ni gaw grau law taw nga ai hpe kadai mung ningdang n lu ma ai. Taxi la ni gaw Kachin ni hkrai galaw ai poi ngu ai hku she chye na ma ai. Yangon mare ting Kachin ni hkrai tup, Moi prat hku rai yang myu sha dawng hkawn hpe gun da ai mu yang pyi 17 (1) the mara rim nna htawng bang na ni re rai tim, ya ndai lang na sara kaba Judson a poi hta gaw, myu sha dawng Hkawn, mungdaw dawng hkawn gaw rangon mare ting kaw tara shang hku lu madun la saga ai. Kachin ni nau law ai majaw nkau mi shala tsun ai gaw Yangon hpe zingla maw ai i? nga san ai pyi nga ai hku re. Karai Kasang a chyeju hpe ja ja wa shakawn ai law. Sen jan ai hpyen hprawng tsin yam ni hpe pu gang sin machyi, gawn lajang lit la nga ai rai tim, alu bang ai lam hta kachin ni hpe kadai n dep ai. Poi up hkang ai sara ni pyi alu nlaw wa jang Kachin ni hpe she alu law law bang ya na matu hpyi shawn wa ai the maren alu grai bai jan lu wa ai gaw, n dai poi hpe madu tai lit la ai gaw Kachin ni re ngu n tsun ai sha rai manu ai. Ndai mung Anhte a Awng padang Yehowa Karai Kasang nan rai nga ai. Lahta na poi hta kachin ni shang lawm ai lam yawng hpe bai n htang maram yu ga nga yang, myen hpyen laba ni e lahkawng ning jan nseng n ang ai hku gasat shamyit hkrum ai, roi rip hkrum ai Kachin ni hpe yu yang, anhte gaw n grit nem ai, hpang n hkrat ai, Kam sham lam, sutsu lam, law htam mayat maya ai lam hta garawt shaw dat ai zawn galu kaba rawt jat wa nga ga ai ngu ai hpe mu lu ai. Myen wa n tara ai hku anhte hpe dang sha magang-

1. Wunpawng sha ni a myit hkrum gahkyin gumdin ai lam pu gang sin machyi tsaw ra hku hkau lam gaw gara prat hta mung ndai zawn re hpe n hkam sha lu yu ai.
2. Wunpawng sha ni Karai Kasang hpe kam sham ai lam gaw Shu a rum gumhtawn , manat chyit re myit the kam sham chye mat ai.
3. Myu tsaw myit rawng ai lam hta, laknak hpai ai hpyen la wa sha n ga, hkawm pyi nlu sai dwi gumgai kaw na, manga kru ning re ma ni a myit hta mung myu tsaw myit maren sha rawng ai ngu ai hpe mu lu ai.

I. Ting Tsing tsun ai gaw, KIA gaw kachin ni yawng a gawng malai nre, nga tsun jahpyak nna maigan masha, mung masha ni kam hpa ai lam yawm mat hkra,tsun nu ai raitim, Myitkyina kaw galaw ai simsa lam zahpawng kaw KIA ginjaw salang ni hpe mung masha ni hkap tau la ai hkrang gaw, n gup the tsun dan taw nra ai, Shat sha ai ni yawng chye yu ai. Masha nre malen pyen U ni, dusat du myeng ni yawng mung chye ai re majaw, Ting Tsing a myit hta gwi gayat n hkra, Ga lahtum n hkra rai mat nu ai.

II. 2012 ning htum maga de Rekhai manghkang hpe Ting Tsing atsu ya gaw wan lagu nat ai marang e, dai ni du hkra mungkan hta gumhkawng ai manghkang rai mat sai. Yaw shada ai lam gaw, a kajawng sha Rekhai manghkang shapraw dat nna, mungkan ting a myi gaw Rekhai ni kaw yu taw nga ai ten hta , KIA hpe dinghku majan tara tawt lai nna, Nbungli the, Camical mashi bawm ni the n-gun kaba dik ai bawm ni the kasat shamyit kau na nga myit nna galaw ai rai tim, Kachin ni n htum mat ai sha mungkan de grau grau dan dawng ai lam she byin wa sai. Rehkai manghkang mung bai shazim mayu tim n mai shazim mat wa ai majaw, Ting Tsing atsu ya a matu gaw,”prat mung nmai, ma-ut mung yak rai ma-um taw nga ra masai majaw, gade lang gayat yu tim, Gwi gayat n hkra, Ga lahtum n hkra she rai masai.

III. Ya ndai nambat masum lang ngu na gaw,amyu lakung Taiyinta ni nzen jang gaw, prat tup prat shang tsinyam pang lai kaw hpungyawt nna prat jahtum shangun maw ai masing rai malu ai.Taiyinta ni yawng a n-gun hpe kaji hta kaji di kau ya nna, shanhte myen ni hkrai prat du prat shang up sha taw nga na ladat rai malu ai. Hpa majaw nga yang March shata hta hta la na rai nga ai, yup tung jahpan hta ai shaloi, Myen ngu ai gaw kaga karan na lam nnga myen sha rai nga nna, Taiyinta ni hpe gaw moi de langai sha rai tim, ya gaw amyu shi hkun nga ga garan kau ya nna, masha jahpan hpe n law dik hkra ga karan kau ya ai. Ga shadawn anhte Kachin ni hpe moi na hku nga yang, amyu lakung kru pawng nna she Kachin amyu langai ngu ai rai tim, ya gaw ndai kru hpe shi lahkawng du hkra ga garan kau dat ai majaw,masha jahpan hku nga jang gaw n law mat sai. Kachin ngu ai jahpan hta marai shi lahkawng rai na malai, kachin mying ai langai sha ngam nga sana. Kaga ni Hka Hku, Du Leng, GauRi,lohvo,lachit, Zai Wa, Li su, Rewang, ni nga nna langai hpra rai mat wa na re. Dai shaloi Jinghpaw mung kaw nga ai jahpan hta Kachin jahpan gaw n law nna kaga maigan jahpan ni she law taw rai jang , Jinghpaw mung gaw , kachin ni mungdaw n re sha, kaga myu ni a mungdaw tai mat hkra myen atsu ya shakut nga ai hpe dum ga law.

Rai tim ndai aten hta,amyu sha taiyinta ni hpang Awng padang Yehowa Karai Kasang lawm ai gaw bai dan len mat sai. Myu sha ningbaw ningla ni hpe Karai Kasang Machye machyang bai jaw ai gaw, hpyen wa a mahkam hpe shawng chye kau ya ai lam rai nga ai. Ndai hpyen wa a mahkam kaw na lawt nna mungdaw mungdan ni grin nga lu na matu gaw,mungdaw langai a gawng malai myu mying langai sha jawm bang ga ngu ai myit hkrum lam rai nga ai.Ndai gaw Karai Kasang anhte hpe myen gumshem a lata kaw na hkye la na matu jaw ai machye machyang re hpe Wunpawng sha ni yawng kam sham ga law.Tsun mayu ai gaw ga shadawn hkang mung kaw yup tung jahpan sa hta jang, Hkang amyu ni law law nga ai kaw na, yawng gaw (Chin) ngu ai mying langai hpe sha jawm bang dat na, dai zawn sam ni mung, kayin ni, Rekhai ni, Mun ni, taiyinta ni yawng dai hku sha bang na matu myit hkrum da sai. Anhte Wunpawng sha ni mung hpa baw san san Kachin ngu sha bang ra na re. Jinghpaw, Lohvo, Lachit, Zai Wa ,li Su, Riwang ,Gauri, Hka Hku, du leng ngu bang ai hku rai jang gaw, “Kachin Pyi Ne”ngu ai mung mat mat wa na re hpe atsawm sha dum nga ga. Mungdaw mat jang anhte gaw hpaw dam, hpaw lam, mungdan nlu ai amyu, ga nlu amyu, gin ru gindai nnga ai amyu, mayam amyu,Gunjang amyu ni rai mat na. Dai majaw, myu lakung ni yawng a malai, “Kachin” a nambat 101 hpe sha bang dat u. Ndai gaw myu sha ningbaw ni, ginjaw salang ni, hpung woi kanu kawa ni yawng myit hkrum da ai nambat re. Kachin ni a matu manu daw dan nlu ai gaw 101, hpyen atsu ya ga lahtum n hkra na mung 101, kaji dik ai jingling u zawn re myu sha ni magwi zawn kaba dik ai myen hpe padang dip lu na mung 101, nlaw la ai ni law wa lu na mung 101, htingbu wa hpe mung tsun u 101, manang wa hpe mung tsun 101, jinghku,nta ting bang na mying mung 101,mare ting bang na mying mung 101, kahtawng ting bang na mung, 101,mungdan ting jawm bang na mung 101, hpa mi nga nga 101, gara kaw mi du du 101,hpe sha bang ga ngu Wunpawng sha ni yawng hpang de hta kaba the Htet dat nngai law. Shut ai kaw sharai la ga ngu, Myu sha yawng hpe hkung ga let

Agu Namti

By-JPKS