Wednesday, February 12, 2014

Masat masa hkungga lara chye ra ai

By-James Alex   Email: kpmrn21@gmail.com
Ndai lawu na laika ngau byin tai na matu hpaji jaw la ai mung dan kata shinggan nga myit rum manang ni hte salang ni hpe chyeju dum dat ga ai.

Shanglawt lu na hkrun lam hta ahkyak ai myit masa
Shanglawt ai myu ni tai na matu tinang myu sha shada da hkungga hkat ai myit masin hpe shawng shaman shakyang ra ai. Shaloi gaw hpang na ninggam hta tinang myu sha lawt lu na lam hpe bai shabyin wa lu na rai nga ai. Tinang shada da yu kaji hkat, hkungga myit dun sumri ai lam n-nga yang shanglawt ai lam hpe tsep kawp gaw gap lu na nrai nga ai.
          Tinang myu tinang shada da masat masa hkungga lara galaw ai lam gaw shang lawt gaw gap ai lam hta ahkyak kaba langai rai nga ai, n-gun kaba mung rai nga ai. Wuhpung wuhpawng gade law ai nlaw ai gaw ahkyak madung nrai, myit hkrum lam she madung ai, myu sha lawt lam hte myu sha yawng a akyu ara rapra tara gaw shada da masat masa hkungga lara hkat ai hta na sha lu la mai nga ai.

          Dai ni tsaban 21 hta mu mada ai lam, myit sawn shachyaw chye ai lam gaw madang tsaw wa ai hte maren, tinang a myit hte mu mada lam hpe aru yu, dinglik yu nna sak hkrung ra ai prat rai mat sai hte maren, tinang chye chyang ai machye machyang hta hkan nna Wuhpung (shn) group hpe hpaw shabawn nna tinang myu a matu lakung lakap tai, atsam shaw rai nga ai ni yawng hpe masat masa galaw chye ra nga ga ai. 

Shaloi she myu sha lawt na lam, mung dan lawt na lam, rap ra ai ahkaw ahkang lam hpe gaw gap la mai na  rai nga ai. Anhte Wunpawng myu sha ni yawng chye na hkap la tawn ai gaw Gum Rawng Gumtsa mung dan gaw gap lam she re, (gumchying gumtsa lai masa hpe nre), myu sha gahkyin gumdin lam, pandung langai hpe shabawn la lu na lam gaw anhte myu ni shada da kata hta masat masa hkungga la ra re lam gaw ningpawt ninghpang ahkyak madung nan rai nga ai.    
KPWRN mahkri shawn hpung

Kachin Politics Watch and Research Network

+++++MYEN GUMSHEM GUMCHYING GUMSA WA A MAW LANYET HTA CHYU YAWNG JAWM MYIT HKRUM AI HKU MUNG NDI GA YAW++++