Monday, February 24, 2014

Ahkyak dik gaw myit hkrum lam


Kachin Politics Watch and Research Network (KPWRN)
Jinghpaw Mung Masa Yu Maram hte Sawk Sagawn Hpung (JMYSH)

Ndai aten hta ahkyak dik gaw myit hkrum lam

          2008 ning mung hpawm Myen mung dan gaw da tara ngut ai hpang 2010 ning kaw nna mung hpawm Myen mung dan a mung masa nbung laru gaw laja lana byin wa sai hpe gadai mung mu chye ai hkrai rai nga sai. Lak lai ai mung masa galai shai lam hta mabyin kumla amyu myu hku nna galai shai wa sai. Lak lai ai mung masa lamyi laman ni hta pary hpaw shabawn nna mung masa galaw na lam, shaning 60 ning jan mat wa sai Myen hpyen hte myu baw sang ni a lapran na mung masa mayak mahkak lam hpe simsa ai hte si mani lai ladat hte jawm hparan na lam ni rai nga ai.

          Ndai zawn mung masa laru kaba ru wa ai ten hta party hpaw nna mung masa galaw na ahkaw ahkang mung lak lai ai masa hku nna byin pru wa sai, ndai zawn byin pru wa ai hte maren anhte Wunpawng myu sha kata hta mung party hpaw shabawn nna mung masa galaw na lamang ni hpe grau nna n-gun dat let shamu shamawt wa sai lam rai sai. 2008 ning gaw da tara hpe nrap ra ai ngu nna mu mada ai hkrai rai nga ai, dai hte maren party hpaw nna 2008 ning gaw da tara hpe gram lajang lu na matu party hpaw let mung masa gasat ai lam ni mung ninggam kaba langai hku nna galaw hpang wa sai. Ndai zawn ninggam hpe manawt dingsawt ai mung masa party gaw Wunpawng myu sha ni hkrai nrai, gaga myu baw sang ni mung party hpaw nna mung masa galaw ai lamang hpe grau nna n-gun dat wa masai.

          Hpa mi rai rai, mung masa hkrun lam hpe shamu shamawt manawt dingsawt let tinang ang ai magam lit hpe galaw sa wa ai shaloi, party mung masa ahkaw ahkang hpe madung tawn na hta myu sha hte mung dan lawt lu lam hte seng ai ahkaw ahkang gaw kaba htum ai lit rai nga ai hpe gadai mung nmai malap na rai nga ai, “ANHTE A AWNG PADANG YEHOWA KARAI KASANG” ngu ai ga baw kata hta (myit mang langai, pandung langai hte awng dang lam hpe lahkrip ra ra jawm shachyaw sa wa ai lam hta myit hkrum let myit mang shabawn ai lam gaw ahkyak kaba nan rai nga ai.

Jinghpaw Wunpawng Myu sha yawng hpe Karai Kasang shaman ya u ga

By - James Alex