Wednesday, February 5, 2014

Hkrap let wa’pu shup nga na malai

Hkrap let wa’pu shup nga na malai, Hkrap let raitim Annau ni yaw shada ai pandung du hkra dating ga ngu nna n-gun shawng jaw mayu ai.
Anhte laga myu bawsang ni myit mada ai,.. Jet ai Federal Munghpawm hpe myen asuya hte ku (saboi) ntsa e bawngban nna jawm gawgap mayu ai rai yang,.. Myen asuya atik anang shabyin mayu taw nga ai mungdan ting gap hkat jahkring sign htu lamang hpe shawng nmai htu ya na re.
Lama na gap hkat jahkring sign htu ngut ai hpang ga’lahtum n shut byin pru wa na myen asuya a masa gaw..
(1) Mungdan gawgap tara constitution ningnan bai jawm ka lu na matu myit mada mai sana nre, gram ka lajang na matu pyi ram ram yak mat sana re.
(2) Thein Sein asuya kyant hkaing party (hpyen asuya) hpe asak bai matut ya ai hte bung mat na sha re.
(3) Thein Sein asuya a mungmasa, sutmasa, hpyenmasa, yawng gaw mungdan kata hte maigan mungdan ni a man e ram ram tsaw mat sana sha re.
(4) Ku (saboi) ntsa e mung masa jahkrup jahta ai shaloi Anhte a dukrung kaw lungdung nna ga ja hte dip shagyeng wa chyalu sha re.
(5) Myen asuya ladat amyu myu hku maw lanyet nna dip shagyeng wa jang laknak lang Rawt Malan Wuhpung ni langai hte langai nru nra byin mat wa chye ai.
(6) KIO/KIA a ntsa e Wunpawng (Kachin) myusha ni a madi shadaw taw nga ai myit dating lam yawm mat wa chye ai.
Thein Sein asuya mungdan ting gap hkat jahkring na matu tsun gajai wa ai 2013 June shata kawn ndai aten du hkra atsawm sha maram yu yang ahkyak madung gaw 2008 constitution hpe shagrin shangang mayu ai masing sha re. Bai nna, mungmasa jahta ai shaloi 2008 constitution shingwang kata de gau ngwi ngwi gang bang la ai masing re.
Bai langai mi Anhte laknak lang Rawt Malan Wuhpung ni chyena tawn ra ai gaw 2008 constitution hten run mat wa na hpe Thein Sein asuya grai hkrit taw nga ai wuhpung ni gaw NLD party hpung ni mung nre, gara mungmasa party hpung ni hpe mung nre. Laknak lang Rawt Malan taw nga ai Anhte bawsang ni hpe sha hkrit taw nga ai re.
Ndai ten hta anhte chyena tawn ra ai bai langai mi gaw, moi lai wa sai ten ni hta gaw myen asuya ni masu sha ai hpe anhte kam ya ai majaw myen asuya ni mung anhte hpe kam ai. Raitimung daini na aten hta gaw myen asuya ni a masu sha ai maw lanyet masing hpe Wunpawng Mungdan Shanglawt Asuya KIO/KIA gaw tsepkawp nkam ya mat sai re majaw myen asuya ni nan mung Anhte hpe nkam mat sai ten re.
Lachyum gaw Anhte mung myen asuya ni hpe nkam mat, myen asuya mung anhte hpe nkam mat, shi mung nkam, ngai mung nkam, nkam hkat mat sai masha lahkawng gara hku bai ni gahtep wa lu na i? Myen asuya kaw na hpa baw myit mada na lam nga nna pawng nga mayu na i?
Kaja wa teng sha tsun ga nga yang, Myen asuya myit magyi magaw nrawng ai rai yang, maw lanyet myit nrawng ai rai yang, myit sanseng ai rai yang, shinggyim nau na myit rawng ai rai yang, maren mara ahkaw ahkang jaw mayu ai rai yang, MUNGMASA SHAWNG BAWNGBAN GA NGU AI HPYI SHAWN LAM HPE KABU GARA HKAP TAU LA MAI AI BUNGLI NAN RE.
Anhte Laknak lang Rawt Malan Wuhpung ni hte shanhte myen asuya ni a lapran hta mungmasa shawng bawngban nna lahkawng maga mungmasa myit hkrum lam ni hpe ninggam hte ninggam lu la mat wa jang gaw mungdan ting gap hkat jahkring sign nhtu tim mungdan gaw simsa mat wa na sha re. Ndai hpe shanhte myen asuya ni n chye ai nre, shanhte pyi grau chye ai, Anhte hte myen asuya byin taw nga ai majan gaw mungdan laga hte (or) mungdan hte mungdan byin taw nga ai majan nre, kundinghku langai mi a kata kaw sha byin taw nga ai mungmasa majan she re. Dai majaw ya gaw tinang a mungdan kata kaw mungmasa shawng bawngban mai sai ten mung rai sai.
Laknak lang taw nga ai lahkawng maga na hpyendap a lapran hta byin taw nga ai majan hpe gaw sign nhtu hkat tawn tim lahkawng maga na seng ang ai ningbaw ni hku nna n-gup aga aming order matsun hte pyi mai jahkring tawn ai bungli she re. Lahkawng maga gap hkat jahkring myit hkrum sign shawng jawm htu tawn tim mungmasa myit hkrum lam nlu jang gaw bai gap hkat ra wa chyalu sha re.
Dai rai yang myen asuya hpa majaw mungdan ting gap hkat jahkring sign htu poi hpe shawng galaw lu na matu dip n-gun jaw taw nga ai i? Lachyum gaw asan sha dan dawng taw nga ai. Maren mara ahkaw ahkang hte gawgap ai Federal munghpawm hpe tsepkawp nkam jaw ai majaw laknak lang Rawt Malan wuhpung ni yawng ma hkra hpe shawng gyit hkintum tawn kau mayu ai masing re. Dai majaw myen asuya hku nna mungdan ting gap hkat jahkring sign shawng htu nna mungmasa bawngban ga ngu ai lam gaw Anhte hpe HKRAP LET WA PU SHUP NGA SHANGUN HKYEN NGA AI HPE DUM GA.
2011 ning majan bai byin wa ai shani kawn Wunpawng Mungdan Shanglawt Asuya KIO/KIA a yaw shada dawdan tawn ai, mungmasa myit hkrum lam hpe shawng lu hkra shawng bawngban nna dinghku majan simsa mat wa hkra shakut na ngu ai dawdan masing gaw tengman ai lam re majaw Karai Kasang mung Anhte hpe pawnba la na re kyu hpyi garum nga ga. Mungmasa shawng bawngban na ngu ai Annau ni a dawdan masing hpe myen asuya ni nkam hkap la nna majan kaba bai baw wa jang gaw hkrap myi prwi hte raitim Annau ni yaw shada ai pandung du hkra anut ga, Karai Kasang gaw shi a kasha ni hpe hpang de ntawn da ai, pawn la nna shi a shawng kaw tawn na ra ai.
Sau Nan Du
By-JPKS