Tuesday, February 11, 2014

အစိုးရ၏ ကချင်တိုင်းရင်းသားများအား ခွဲခြမ်း၍ သန်းခေါင် စာရင်းကောက်ခံမည့်အပေါ် ကချင်လူထုကန့်ကွက်


(KNG)
ကချင်ပြည်နယ် ရှိလူထုအခြေပြုအဖွဲ့အစည်းများက မကြာမီ အစိုးရကောက်ခံမည့် သန်းခေါင်စာရင်းတွင် ကချင်တိုင်းရင်းသားများကို ခွဲခြမ်းစိပ်ဖြာ ထားသော အမှတ်စဉ် ကုတ်(code)နံပါတ်များကို ဖြုတ်ပေးရန် ဖေဖော်ဝါရီလ (၇) ရက်နေ့တွင် အစိုးရထံသို့ ကြေငြာချက်ထုတ်ပြန်၍ တောင်းဆိုလိုက်ကြောင်း သိရသည်။

အဆိုပါ အစိုးရ၏သန်းခေါင်စာရင်းကောက်ခံမှုအချက်များတွင် ကချင်လူမျိုးနွယ်စုကုတ်နံပါတ်အား ရှုတ်ထွေးစွာထည့်သွင်းပေးထားပြီး၊ မလိုအပ်သော အချက်များကိုထည့်ထားကာ လိုအပ်သောအချက်များကို ချန်လှပ်ထားမှုများရှိနေသောကြောင့် ထိုသို့မှားယွင်းစွာ ကုတ်နံပါတ်များထားပါက ကချင်လူမျိုးနွယ်စုများ အကြားရှုတ်ထွေးမှုဖြစ်လာနိုင်ပြီး လူမျိုးနွယ်စုများအား သွေးခွဲလိုက်ခြင်းသာဖြစ်သွားမည်ဟု ပြောရေးဆိုခွင့်ရှိသူ ဦး K ဇော်လွန်းကပြောသည်။

“သန်းခေါင်စာရင်းမေးခွန်းတွေဖြစ်တဲ့ နံပါတ် (၈) ကုတ်ထည့်ရမယ့် မေးခွန်းကို ဖြုတ်ထားပေးပါ၊ အဲဒါမမေးရင် ကချင်လူမျိုးနွယ်စုကြားမှ ရှုတ်ထွေးမှုမရှိတော့ဘူး၊ ကချင်တစ်ခုတည်းနဲ့ပြီးသွားပြီ။ ဒါမှမဟုတ် ကချင် 101 တစ်ခုတည်း ထားရင်လည်း ဘာမှပြဿနာမရှိဘူး ဒေသ၊ ရွာ နာမည် ဂေါ်ရီ၊ ခခူး (Gauri, Hka Hku) လိုဟာမျိုးကို လူမျိုးနွယ်စုကုတ်နာမည်တွေ ပေးထားတာတွေ့ရတယ်။ အဲဒါက လူမျိုးစုတွေကြားမှာ ရှုတ်ထွေးမှုဖြစ်လာစေတယ်၊ မေးချင်ရင် ငြိမ်းချမ်းရေးရတဲ့အခါမေးပါကချင်လူမျိုးနွယ်စုထဲမှာ လူမျိုးစုတွေဖြစ်တဲ့ လီဆူ၊ ရ၀မ် တွေကို ရေးရာဝန်ကြီးပေးထားခြင်းက လူမျိုးစုတွေကြားသွေးခွဲနေခြင်းဖြစ်တယ်၊ နိုင်ငံတော်မူဝါဒနဲ့လည်းဆန့်ကျင့်တဲ့ကိစ္စဖြစ်တဲ့အတွက် ရေးရာဝန်ကြီးပေးထားတဲ့သူတွေကိုလည်း လွှတ်တော်မှာ တရားစွဲထားခြင်းဖြစ်တယ်၊ တိုင်းရင်းသားတွေက အဲဒီလိုရှုတ်ထွေး စေတဲ့ဟာကို လက်မခံဘူး” ဟု ပြောသည်။

ထို့အပြင် အစိုးရသန်းခေါင်စာရင်းအား ၄င်းတို့သတ်မှတ်ထားသည့်အချိန်တွင်ကောက်ခံသွားမည်ဆိုပါက နိုင်ငံအတွင်း ငြိမ်းချမ်းမှု မရှိသေးသောကြောင့် တိုင်းပြည်အခြေအနေ မှန်ကန် သင့်လျော်သည့်အချိန်တွင် ကောက်ခံရန်လိုအပ်သည်ဟု ဆက်တောင်းဆိုထားကြောင်း သိရသည်။

“သန်းခေါင် စာရင်းကောက်ခံခြင်းဟာ စစ်မှန်တဲ့သန်းခေါင်စာရင်းကိုရရှိပြီး ပြည်သူ့လိုအပ်ချက်တွေ၊ ဖွံ့ဖြိုးရေး လိုအပ်ချက်တွေ ဖြည့်ဆည်းရန်အတွက် လူဦးရေစာရင်းကိုအသုံးပြုဆောင်ရွက်သွားမယ်ဆိုတဲ့ ပြောဆိုမှုတွေရှိတဲ့အတွက် အချိန်ကို ရွှေ့ဆိုင်းပေးဖို့လိုတယ် အခုချိန်ထိ မြန်မာနိုင်ငံမှာ ငြိမ်းချမ်းမှုမရသေးတဲ့ ဒေသတွေ ဆက်ရှိနေသေးတယ် ဘယ်လိုမှမှန်ကန်စွာကောက်ခံနိုင်ဖို့မဖြစ်နိုင်ဘူး အစိုးရရဲ့ ပြည်သူတွေကိုဖြည့်ဆည်းပေးမယ့် ပရောဂျတ်တွေလည်း မမှန်ကန်နိုင်ဘူး၊ မမျှတတော့ဘူး ဒါကြောင့် လုပ်ငန်းစဉ်ကိုသင့်လျော်တဲ့အချိန်သို့ ရွှေ့ဆိုင်းပေးရန်လိုတယ်” ဟု ဆက်ဆိုသည်။

နိုင်ငံတော်အစိုးရမှ ၂၀၁၃ ခုနှစ်၊ ဇူလိုင်လ (၂၉) ရက်နေ့တွင် လူဦးရေနှင့်အိမ်အကြောင်းအရာ သန်းခေါင်စာရင်း ဥပဒေတစ်ရပ်ကို အတည်ပြှုဋ္ဌာန်းလိုက်ပြီးဖြစ်သော်လည်း ၁၉၈၃ ခုနှစ်သန်းခေါင်စာရင်း ရရှိသည့် အပေါ် အခြေခံဖော်ပြထားခြင်းဖြစ်ကာ ယခုလက်ရှိ လူမျိုးနွယ်စုဆိုင်ရာခေါင်းဆောင်များကိုလည်း တွေ့ဆုံ ဆွေးနွေးမေးမြန်းမှုများမပြုလုပ်ပဲ ဆုံးဖြတ်ချက်ချလုပ်ဆောင်ထားခြင်းဖြစ် ကြောင်းသိရသည်။

အစိုးရတပ်များနှင့် တင်းမာနေဆဲဖြစ်နေသော ကချင်ပြည်နယ်တွင် ထိုသို့သန်းခေါင်စာရင်းကောက်ခံရန်အပြင် ကချင်လူမျိုးများထဲမှ မျိုးနွယ်စုများကို ထပ်မံခွဲ၍ ကောက်ခံရန်လုပ်ဆောင်ထားခြင်းကြောင့် လူထုခေါင်းဆောင်များကြား မလိုလားကြောင်း တောင်းဆိုနေခြင်းဖြစ်သည်။

အစိုးရ၏ ၂၀၁၄ သန်းခေါင်စာရင်းဆိုင်ရာ သင်္ကေတများကြောင့် ကချင်လူမျိုးစုများအကြား အငြင်းပွားမှုများ ဖြစ်နေရပြီး ကချင်ပြည်လူထုအခြေပြုအဖွဲ့အစည်းများ (၂၃)ခု ပါဝင်သောအဖွဲ့အစည်းများက အချိန်နောက်မကျခင် အမြန်ဆုံး၎င်းတို့၏ တင်ပြတောင်းခံထားမှုအား ပြင်ဆင်ပေးရန်တောင်း ဆိုထားခြင်းဖြစ်ကြောင်းလည်းသိရသည်။