By
Kachin National Alliance Party for Democracy
Shawng ningnan e anhte wunpawng myu sha yawng a matu gawng malai tai nna shawng lam majan pa hta kaw si hpang gara hkrum, machyi makaw hkrum yak hkak jam jau lam amyu my hpe hkam jan nna mung dan hpe makawp maga ya nga ai myu tsaw share shagan ni yawng hpe shawng ningnan hkung ga jaw dat n-ngai. Nan hte share shagan ni hpe galoi mung bausin nga ai hpan wa Karai Kasang gaw nanhte a myu tsaw myit masin hpe galoi mung shaman chyeju jaw nga ai hte maren, nanhte share shagan ni hte anhte mung kan shara shagu du hkawm nga ai myu sha ni a lapran hta galoi mung myu tsaw mahkrai hkrai ya nga ding yang rai nga ai. Hta n-ga Wunpawng mung dan hte wunpawng myu sha ni a gam maka tsawm htap wa lu na matu baw nu shuk let shakut shaja nga ai wunpawng mung dan asuya ning baw ningla ni yawng hpe mung hkung ga let madi shadaw n-gun jaw nga ai lam tsun mayu ai. Wunpawng mung dan hte wunpawng myu sha ni a gam maka tsawm wa hkra shakut ai lam hta pu ba ai masa nbung na ga ai, nkau mi salu salat hte pu ba ai, nkau mi baw nu myit sawn ai masa hku nna pu ba ai, nkau mi shakut sharang ai hku nna pu ba ai, nkau mi mung kan mung dan ni hpang de wunpawng myu sha ni a lam hpe Media hku tsun ndau ai, nkau mi mai gan salang ni hte hkum tut hkrum nna tsun ndau ai lam ni hku nna pu ba ai.
Pu ai, ba ai lam nbung tim yawng gaw wunpawng myu sha ni a matu shakut shaja ai hkrai rai nga ga ai. Dai majaw Karai Kasang gaw gadai wa gaw gade ram pu ba ai, gade ram teng man sadi dung nna pu ba ai lam hpe chye ya nga chyalu rai nga ai. Yawng matut manoi jawm shakut nga ga. Ya matut nna rawt malan ngu ai lachyum hpe tinang lai ka ka ai wa hku nna mu mada ai mu jut loi mi hpe garan dat mayu ai.
Rawt malan ai ngu ai lachyum hpa rai ta? Rawt malan ai lachyum amyu myu nga na rai nga ai. Rai tim ndai laika hta tsun mayu ai lachyum hpe sha gadun dawk tang madun na ga ai. gadun dawk tang madun ai lam hta Myen mung dan kata hta rawt malan ai mabyin masa hte rawt malan nga ai lachyum hpe gadun sha mi tang madun mayu ga ai.
Rawt malan ai ngu ai gaw myu sha baw sang langai a matu tsaw dik htum ai mung masa pan dung langai rai nga ai. Rai sa dai pan dung gaw hpa rai ta? Mung dan lu na matu, myu sha ni lawt na matu, mung dan langai mi byin tai nna mung dan asuya ya hkrang gaw gap lu na matu rai nga ai. Rai sai ndai lam hpa majaw ahkyak a ta? Myu sha baw sang langai mi gaw mung dan lu ai, bai nna mung dan asuya hku nna nga lu ai myu sha baw sang ni gaw mung kan e nga nga ai mung dan ni hte mung dan langai hte langai masa hku nna madang dep dep matut mahkai mahkri shawn, maren mara bawng ban jahkrup nna, mung dan langai hte langai htinglu htinglai lu ai lam hpe ading tawk galaw mai nga ai.
Ga shadawn loi dik ai hku tsun ga nga yang, anhte Jinghpaw Wunpawng myu sha ni hpe madi madun nna tang madun dat yu ga. Anhte Jinghpaw Wunpawng amyu sha ni mung dan asuya hku nna tara shang nrai nga ai majaw Miwa gum san makan wa hte mung dan masa lam hpe ading tawk bawng ban lu na ahkang nlu nga ga ai. Dai gaw loi dik htum ai ga shadawn re, dai hta grau nna sung ai lachyum ni amyu myu naw nga na re. Dai zawn ading tawk nmai bawng ban ai lachyum gaw anhte jinghpaw wunpawng mung dan gaw kaga lak san re asuya nga ai mung dan nrai nga ai majaw rai nga mali ai.
Singapore mung dan hpe yu ga Jinghpaw mung daram dam ai kun? Kaba ai kun? Singapore mung dan gaw dam lada ai lam n-nga ai kaba ai lam n-nga ai, rai tim shi hkrai asuya langai hku nna lak san re mung dan re majaw kaga mung dan asuya na ning baw ni hte ading tawk hkrum bawng ban ai lam mai galaw nga ai.
Myen mung hpe ga shadawn la nna tsun ai shaloi, “Federal democracy” phedare demokresi mung hpawm mung dan nga nna shamying ma ai, dai hte maren dai ni rawt malan taw ai rawt malan hpung ni a nsen hpe madat dat jang jet ai hpedare mung hpawm asuya byin pru wa hkra rawt malan nga ai lachyum rai nga mali ai. Nkau mi tsun taw nga ai gaw tinang hkrai lak san mung dan asuya gaw gap na matu rawt malan ra ai nga nna tsun ai ni mung nga nga mali ai. Ndai shara hta tsaw dik htum ai gaw tinang hkrai lak san mung dan asuya byin hkra rawt malan ai lam gaw tsaw dik htum ai mung masa pan dung rai na re ngu tim nshut nga ai. Hpa majaw nga yang lak san mung dan asuya gaw lahta kaw tang madun mat wa sai hte maren gara mung dan asuya hpe mung ading tawk, mung dan lam hte mung masa lam hpe bawng ban daw dan jahkrup mai nga ai. “Federal” jet ai asuya langai paw pru na matu hte “federal” njet ai asuya hpe rawt malan ai madang atsang kaw shat sap na kun ngu ai lam hpe sung sung myit yu ra nga ai. Lama wa “federal” jet ai asuya paw pru sai rai yang rawt malan ai lam gaw htum mat na kun? Nsa dawm mat na kun?
Rawt malan ai lam hte ading tawk nseng ang ai lam langai mi tang madun mayu na lam pru wa ai, lai wa sai Feb 5 ya shani hta anhte wunpawng myu sha ni a matu ahkyak dik htum ai rawt malawn ning htoi re ngu hkam la ai, dai rai yang Kachin net shi ga dap hte kaga wunpawng Media hta lai nna, Jinghpaw hte seng ai kaga shiga dap ni hta e Jinghpaw rawt malan lam hte seng ai lam hpe grai wa ka tang madun ai lam n-nga ai hpe mu lu nga ai. Rawt malan ngu ai lachyum hta lak nak hte rawt malan ai ladat hte sha nrai nga ai. Hpaji hte rawt malan ai lam mung rawt malan a lami laman langai rai nga ai.
Jinghpaw Wunpawng amyu sha Demokresi Ginrun Pati gaw tinang mung dan kata hta tinang myu sha ni nan asuya byin lu ai lam hpe she grau nna myit mada ga ai.
By KNAPD
