Sunday, November 13, 2016

Karai Masa Hku Wupoang mung dan shang lawt lu na lam


karai a ahkaw ahkang hte shanglawt lu la na matu ahkyak dik ai lam gaw
‘gingdan ai’ ngu ai lam rai nga ra ai.
Gingdan ai ngu gaw, karai kasang kaw nna shanglawt lam jaw ya ai hpe hkam la na matu gingdan ra ai hpe ngu mayu ai re.
Ga shadawn kaja hpu reng ai namman hpe hkrup mara nsan seng ai gawm hte hkap ja la yang jaw na wa, kam jaw sana nrai nga ai. (Njaw mat sana re.)
Karai kasang kaw na shanglawt lam hpe hkam la lu na Gingdan ai lam byin na matu….
(1) Kam ra ai (kam sham myit hpring ra ai)
Karai kasang gaw kaja wa nga yawng dang hta ma hkra hpe hpan da ai karai, asak hkrung ai karai, yawng mayawng hpe dangdi lu ai karai, kaja wa shabyin lu ai karai, karai kasang ndang di lu ai hpa nnga ai Karai hpe hkrak kam sham ra ai.
Bai anhte hte karai kasang rau rai nga ai, anhte hpe karai kasang garum nga ai, shi anhte hpe makawp maga nga ai ngu hpe hkrak kam sham ra ai.
Ndai kaw chyum mungga hta adan aleng tsun nga ai, shaning law law sai hkaw ai num wa kam sham myit hte yesu a palawng sa ahtawk yang kaja wa shi a sai hkaw ana mai mat ai, yesu tsun ai ga gaw na a kam sham myit gaw nang hpe shalawt sai ngu re.
Kaja wa kam sham lam nga ra ai.
Karai kasang hpe kam ai hte akyu hpyi ra ai.
Anhte a lam karai kasang kaw ap da ra ai.
Dai hku ap da ai hpe karai kasang gaw karum na kun ngu myit nmai ung ang ai, Karai kasang dangdi na kun ngu nmai myit ung ang ai.
Karai kasang galaw jang gaw shinggyim masha ndang chyena hkawn hkrang lu ai, mau hpa amu galaw ai hpe chyena ra ai.

(2) Madat mara ra ai, kaja wa ta tut hkan nang hkan sa ai.
Kam ai ngu hte sha nngut shi ai, madat mara hkan nang hkan sa ra ai. Hkrang shala ra ai.
Gaida jan gaw hka nlu wa ai majaw shi a kasha hpe hka madu ni hka sawn la kau na ngu tsun ai majaw grai myit ru jamjau hkrum nna myihtoi Eleshia hpe sa tsun dan ai. Myihtoi wa gaida jan hpe san ai nang kaw hpa baw nga ai rai nga. Gaida jan tsun ai namman tau mi lu ai nga. Myihtoi wa gaw gaida jan hpe wa nna nga manga yambu ni lajang da, htingbu ni hkan na mung lu ai daram shap la u, ngut jang dai namman tau hpe ru bang u ngu matsun dat ai. Gaidan jan mung htet ai hte maren wa galaw ai. Shi lu ai namman tau mi yambu ni kaw ru bang tim n hpe yambu kaw rung bang yang dai yambu hpring mat nna langai hpang langai kaw bang yang mung yambu mahkra kaw hpring mat rai nna kasha hpe yambu naw la war it ngu tsun yang kasha gaw yambu ma sai nu nga tsun ai hte bang taw ai namman mung hkring mat sai.
Ndai kaw tsun mayu ai gaw gaida jan wa gaw myihtoi wa a ga hpe kam ai hte ta tut mung madat mara hkan nang hkan sa galaw ai hpe tsun mayu ai re. Karai kasang anhte hpe galaw shangun ai lam hpe kam ai myit hte madat mara ta tut galaw sa ra ai.
Dawi ma wa karai kasang shi hpang maga lawm na hpe kam ai, nlung kabai ai gaw ta tut hkrang shala ai sha re, dai kaw karai kasang bungli galaw ai re.
(3) San seng ra ai.
Anhte a hkum hkrang ni, anhte a wuhpung wuhpawng ni gaw san seng ra nga ai. Mai kaja ai magam bungli ni hpring ra ai, tsawra myit nga ra ai, tengman tara rapra ra ai.
Awu asin lam ni, karai kasang nra ai lam ni, matsat shabat lam ni, yu bak lam ni nmai nga na re.
(4) Karai kasang a nsen hpe chye madat ra ai.
Karai kasang anhte hpe hpa tsun nga ai ngu hpe galoi mung madat taw ra ai. dai nsen hpe chyena ra ai. Dai hpe kam ai hpe hkan nang hkan sa ra ai. Dai nsen hte na lu na matu akyu hpyi ra ai.
Ga hpungdim
------------------------
Karai kasang a ahkaw ahkang hte shanglawt ai lam hpe hkam la lu na matu anhte shanglawt ai mungdan lu na matu GINGDAN RA GA AI.
GINGDAN NA MATU kaja wa kam myit rawng ra ai, shi a nsen matsun hpe hkan nang hkan sa ra ai, san seng ra ai.
Karai masa hku nna shanglawt lam hpe myit ai shaloi gaw anhte a masha n gun, laknak atsam ni, hpaji machye machyang ni gaw madung nrai nga ai.
Karai kasang anhte hpe ahkaw ahkang jaw ai njaw ai ngu ai gaw madung rai nga ai.Dai gaw ahkyak dik ai lam rai sai.
Karai kasang gaw anhte kaw na mauhpa magam bungli kaba ni galaw na re. Anhte gaw hkrang shala ai lam sha rai wa na re. Maw she gaw hkrang shala ai, Karai kasang gaw mauhpa magam bungli galaw ai, dai hte maren Da wi ma gaw kam ai hte ta tut bungli galaw ai karai kasang gaw mauhpa amu galaw ai.
Isreal amyu masha ni Hkanan mung de shang na gingdan ai shani she Hkanan de shang lu nga ai re. Gingdan ai shani gaw kadai wa kaning re masha amyu mung Hkanan shang na lam hpe nlu shingdang lu nga ai.
Dai majaw Anhte Shanglawt ai mungdan lu na matu “GINGDAN NGA SAGA AI KUN?”
Chyeju kaba sai,
Tara Kasa.
Ndai gaw Tara Kasa a shawng nnan lang na Post re.
October 7, 2016. 10:00 PM.