Mung shawa a Tsap Shara hte Mung masa Samaq

Daniel Nan

Dream (17)

Mung shawa a Tsap Shara hte Mung masa Samaq

1

Anhte a awng padang lam hta, Wunpawng Myusha mung shawa a tsap shara gaw rudi dawnu rai nga
mali ai.

Dai majaw, mung shawa gara hku tsap ai ngu ai gaw nachying ahkyak nga mali ai. Mung shawa shamu shamawt lam ni gaw awmdawm bungli hpe pawm shangang ya ai Liberation Movement ni rai nga mali ai.

2

Myitkyina lam hkawm ai lam hpe Hpyen wa e lachyum gale nna media de shapoi ya n hkrum hkra sadi ra na ga ai. Lawu na lam ni ahkyak ai ngu mu ai:

1. Shanglawt ni majan sum wa ai majaw, mung shawa hpe majan
jahkring ya na marawn shangun ma ai, ngu ai lachyum hku shapoi kau ya na sadi ra na hpe mu ai.

2. Anhte a nsen gaw maga mi san tsap ai lam hpe dan dan leng leng madun ra na ga ai. RFA, DVB hte kaga shiga dap ni san ai hpe htai ya ai wa gaw grai sadi nna shaga htai ya ra na hpe mu ai.

3. Simsa lam hpe ra ai majaw lahkawng maga na ni hpe tsun mayu ga ai, nga jang anhte a matu akyu
n nga mat sai, hpyen wa matu gaw ahkaw ahkang bai tai mat na.

4. Dai majaw, anhte mung shawa gaw Myen hpyen a htu shadut anin je hpre shang wa ai hpe nra sharawng ai lam, Shanglawt hpe anhte tsawra madi shadaw ga ai lam ni madun ra nga mali ai.

5. Anhte marawn nna shanhte jahkring na nre, raitim anhte marawn ai lam gaw mung masa amyat pru ra nga mali ai.

6. Marawn ai lam hta madung dat ai lawnglam nau law yang mung lachyum manu yawm mai ai majaw, lawnglam kaba lahkawng daram hpe madung dat nna, de kata kaw mahtang kaga lam ni ka bang shalawm nna garan laika hkyep - pamphlet ni lajang mai nga mali ai.

3

Anhte mung shawa ni masa lam ni hpe sung sung li li dinglik maram nna lata ginhka let tsap sa wa ra ai aten du sai.

Tinang galaw ai lam gaw hpa baw re, hpa majaw galaw ai, hpa baw yaw shada ai, kaning mai rai wa ai, ngu ai lam ni hpe mung chye da ra nga mali ai.

Ngai nchye nna galaw shut kau ai re, ngu ai ga gaw "tawngban nngai" nga ai nhkan e sha, galaw shapraw kau dat ai majaw bra chyam taw mat sai lachyum - meaning/ value ni hpe gaw gara hku mung bai nmai hkan shaprai kau sai. Mu la, na la, matsing da nna lachyum htai shapraw ai ni a lata kaw she rai mat sai.

Tsun mayu ai gaw,Hpa galaw tim mung masa myi hku yu ra ai aten rai nga mali ai. Sadi maja ra nga mali ai.

4

Simsa mayu ga ai, wa mayu ga ai ngu ai ni anhte ntsun ra sai. Grau nna Media ni hte shaga ai ten grai sadi let mung masa nsen mahku manawng hku shaga ra na ga ai.

Mung shawa ni nsen manaw langai de hkyawm rai jang anhte bungli awng dang na de myi man yawng nga sai, ngu mu nngai.

Mung masa myi sam ai ni grau nna tai wa mi ga.

DN