Saturday, October 26, 2013

MYEN ASUYA HPE DU MANAT TAWN LU NA MUNGMASA HPYEN MAN

Myen mungdan hpe shanglawt jawm la tawn ai shani kawn daini du hkra Anhte masha jahpan nlaw ai amyu bawsang ni hpe dip gamyet up sha taw nga ai myen asuya hpe du manat tawn lu ai mungmasa hpyen man gaw.. Wunpawng Mungdan Shanglawt Asuya KIO/KIA hku nna ndai ten hta hkrang shapraw taw nga ai dawdan masing rai nga ai.
(1) Myen mungdan kawn galoi mung n-ga garan pru ai, ngu ai hpe galoi mung sign htu na nre, ngu ai dawdan masing.
(2) Ngang grin ai simsa lam lu na matu tengman ai mungmasa mahtai myit hkrum lam lu hkra shawng bawngban na, ngu ai dawdan masing.
(3) Gasat gala yawm mat wa na matu lahkawng maga a lapran kaw yu gawn jep hpung tawn na, ngu ai dawdan masing.
(4) Machyoi hpa ji hpung hpaw nna mungshawa shang lawm lu ai dawdan masing.

Myen asuya gaw gara asuya mi galai lai, lai wa sai ten hta mi rai rai, Du na ra ai ten ni hta mi rai rai, Masu magaw, Hkalem hkalau, Makoi magap, Maw lanyet na asuya sha re. Ndai zawn re myen gumshem asuya hte rau naw jawm nga mayu yang gaw lahta na lawnglam 4 tup hpe ja ja jum tek tawn nna hparan mat wa yang chyu sha ram hkrak rai na re.

LAWNGLAM No.1
Myen mungdan kawn galoi mung n-ga garan pru ai, ngu ai hpe sign htu kau dat jang gaw Anhte hpe madaw myen asuya ni hta’ni hta’na du manat tawn hkrum ai amyu ni byin mat na. Lachyum gaw myen asuya ni kaning di roi sha, dip gamyet sha tim hkam sha, mana sha na saga ai ngu nna hkam la ai hte bung mat na. Dai majaw KIO/KIA gaw n-ga garan pru na matu galoi mung sign htu na nre.
LAWNGLAM No.2
Ngang grin ai simsa lam ngu ai gaw.. tengman ai, lu ging ai, lu nan lu ra ai mungmasa ahkaw ahkang ni hpe lahkawng maga maren mara hkam la lu jang she ngang grin ai simsa lam mai lu ai. Daini Annau ni hpyi taw nga gaw.. nmai byin ai hpe hpyi taw nga ai nre. Nnga ai hpe hpyi taw nga ai mung nre. Nga taw chyalu Panglong ga sadi hte maren lu nan lu ra ai hpe hpyi taw nga ai she re. Dai majaw tengman rap ra ai mungmasa ahkaw ahkang lu na matu mungmasa shawng jahta ra ai.
LAWNGLAM No.3
Myen asuya hte gap hkat shawng jahkring nna tengman ai mungmasa mahtai lu hkra dara la ga ngu ai gaw.. Yupmang kaw na nga ka, Shingran kaw na tsa pa, (or) Hka ntsa e sumla soi ai hpa sha re. Bai nna mye asuya hte gap hkat jahkring na matu maisau pa ntsa kaw sign jawm htu ai lam gaw shanhte myen ni mungmasa amyat htuk la na matu hte Anhte hpe mara tam na matu sha re. Dai majaw lahkawng maga a lapran kaw gasat gala gawnjep hpung tawn nna jumtek kau ai gaw madung rai nga ai.
LAWNGLAM No.4
Annu ni hte myen asuya byin ai manghkang gaw mungmasa manghkang re. Daini na mungkan hta mungmasa manghkang hpe tengman ai hku dawdan la lu na matu mungmasha hte media a madi shadaw ai lam grai ahkyak nga ai. Dai majaw Annau ni tengman ai nsen langai hte shakut ra sai. Machyoi hpa ji hpung hte media kawn mungmasha a madi shadaw ai lam lu la nna Annau ni myit mada nga ai Awmdawm ahkaw ahkang hpe teng sha lu la na re.
Sau Nan Du
By-JPKS