(Kachinnet)
Muse Ginwang, Pang Sai (Chyu Kote) Ginwang Daw, Nam Tau mare buga masha ni a hkai sun lamu ga ginra ni hpe N.A.HP asuya uphkang ten Mungdan Hkai Sun masing ngu ga baw hte yi sun lamu ga ginra Eka(338) daram hpe atik anang zing la wa sai lam dai mare buga masha ni kawn chye lu ai.
Ndai shara ni hta ya ten lakmat nlu tara nshang ai kumshu sun hpe maigan Miwa amyu sha ni galaw sha nga ai lam chye lu ai.
Ndai zawn rai zing la kau ya ai majaw buga masha ni gaw prat ban hte ban galaw sha hkrat wa sai lamu ga ginra ni hpe tat sum kau ra ai sha n ga, dai zawn zing la ai shara ni hta arang kaba hte galaw lu galaw sha ai ni gaw lamu ga maden jat wa ai majaw makawp maga tawn ai nam maling ni kaji wa nga ai hte lamu ga shingra hten za ai, hka pru shadang yawm wa nga ai lam, hkai sun galaw ai hta akyu shawn lang ai shingtai sat ai dat tsi ni a majaw lu hka n san seng shangun ai manghkang ni byin nga ai hpe buga masha ni hkrum sha nga ai lam chye lu ai.
