LAGAW HKANG DINGSA DE SHA KUN

Moi na lagaw hkang bai hta chyai, hti chyai ai masa de she bai gayin wa nga sai kun? Moi na mabyin hpe marun chyai, masawp chyai, laga bawsang ni simsa masat htu ai zawn yahtu yamat, yamu yahka ngu ai masa kaba de sha bai kayin hkawm, shingran nga sai kun? tsang ai. Le ra zawn zawn, waw ra zawn zawn, hkye madu hpe tam shamat ai zawn, gumra tam shamat kau ai Miwa la zawn re masa hta she tsap nga sai ngu ngai hku na myit sawn yu nga ai re. N’htuk hkat dik ai Miwa hte Japan a gang shing jawng hkat ai lapran hta, mung masa ku de bawngban shangut la lu na tam shamat kau na masa she pru nga sai. Mi kaw na myen gaw madu uphkang mungdaw n’kam jaw nga ai hta uloi kaba lahkawng duru hkat ai kaw na tsingdu she tai mat hkyen nga saga ai. Ten garawt mayu nga ai myen a matu, ahkyak hta mak hpai chyawp ngu ai baw wa n’rai kun? Shaning galu hpyen kyep din a n’pu mazang n’rin, shoi mi achyum, matsan chyaren re prat kaw na annau ni galoi she lawt pru lu na ta? Ya mung moi na hte maren matut mahkai rung ni hpaw, hpyen du shada kanwang bungli chyawm garum hkrat rai. Galoi nlu jawn ga ai, mawdaw n’tsa myi n’pu na ladi n’mu zawn, gawngba shakawng, magam yingam galaw sha ai ni hte kalang bai mala hka wa na masa she bai pru nga sai kun? Shingran ai. Annau ni gaw gara hpyen hpe mung kam na yak mat wa na sai. Mung masa bawngban shagrin na, hpa rip kawp tara langai mi pyi grai n’mu shi ai kaw moi na zawn re lahkam de bai shamawt ga ngu ai gaw shawng lam hpe shingran yu yang, moi sari mu ga sai madang de bai gayin kabye bang wa na sai kun?Myen a kata lam shamu shamawt ai lam grai n’lai shi nga ai kaw nau tin yang gataw na tsang ai. Wunpawng Myu Sha ni tau nau n’na, awmdawm shanglawt hpyen hpung kaba langai bai hpaw ra wa na kun? Myit jahkut tawn wa ra na sai kun? Shawng lam gaw ung ang nga ai. Moi na mabyin dingsa hkang dingsa sha gaw n’hkan saga ngu ningbaw ningla ni hpe lajin mayu ai. Baren Numraw bY/JPKS