UMA BUM NSEN

Kachin Land

Nga yak la ai Uma Bum,
Mungkan hpaji hpa nhkum.

Chyoi chye kung zet ai ni gaw yu mat wa;
Nkung nzet ai hte jahkrai gaida ni hkrai ngam taw nga.

Bumyi galaw nna, shakut sha,
Jahpawt kaw nna, shana de du hkra.

Nta madu jan gaw, hpun lit gun let, maba kaye;
Madu wa gaw hpun jum hpai let sanat hpye;
Mare, dinghku, magam sha n-ga,

Gasat gala lit mung la ra ai bai nga,
Magyi ka la ni, laja lana bainam ja;
Buga makawp maga sha n-ga;
Lawu ga shawng lam de du hkra,
Hpyen garum gasat mat wa.

Ya Uma Bum shara ni du yu hkum,
Majan laja tim myu tsaw brang ni masin lum.
Uma Bum atsam galoi n shayawn,
Magyi ka la ni majoi gyawm.

Majan ngut nna Uma Bum de bai nhtang du,
Yu wa manang ni hkum nhkum bai shagu,
Kasha sum pum sum baw a kawa ni she nhkum pru.
Ntsun mung nmai tsun mung nrai,
Asak ap nawng sai ni a dinghku,
N-ji nmu, hkrap ngu hkrap ngoi garu.

Htingbu, hting pyen, ni yawng mau nna matu,
Oh.... jiwoi jiwa ni a nchyoi nchye ai hka,
Magyi ka ni a maw lanyet de ndum shami shang mat wa.
Tinang magam ahkaw ahkang bai lu hkra,
Bum nga Bum pra nang ngai nnga;

Dai ni bai sai maw sai hkyeng hkaw kau ra sahka.
Nga yak la ai Uma Bum a kam maka,
Matsan masha jahkrai gaida,
Malu masha nlu sha tim, kadai hpa nnga,
Bum nga masha hpe manu ntawn da.

Law htam galu kaba, gawn hkang tara ningra,
Prat ram ni gaw brun mat wa,
Dinggai dingla ni sha ngam taw nga.

Hpang de Uma Bum sin ma gadai ta?

Uma Bum Nbat
M.H.H