Kachin Alliance Party for
Democracy (KAPD)
Jinghpaw Wunpawng Dimokresi
Ginrun Party
Anhte myu sha ni gaw Karai lu ai myu ni rai ga ai hte
maren anhte myu ni lawt lu na lam gaw Hpan wa Karai Kasang hta sha rai nga ai. KIO
ningbaw ni a yaw shada ai pan dung hta anhte myu ni, mung masa party gade mi
jat wa ai rai tim yawng gaw pan dung langai sha rai ra ai nga nna KIO salang ni shadum shahprang ai
lam hpe tang madun dat ai lam rai nga ai.
Jinghpaw mung masa party (mung masa hpung ni) (A)
Kachin State Progressive Party KSPP (B) Kachin National Congress for Democracy KNCD
(C) Kachin People Party KPP(D) Kachin National Congress KNC hte Kachin
Alliance Party for Democracy (KAPD) ni rai nga mali ai.
KIO/KIA gaw anhte myu ni a awng padang lam hpe gaw gap
nga ai hte maren anhte myu ni party hkrang masa hku nna, mung masa ning gam
tsang hte tsang shamu mamawt lu na matu mung KSPP party hpe mung hpaw ninghtan
dat sai rai nga ai. KIO/KIA gaw anhte myu ni a gam maka hpe tsawm wa hkra ladat
amyu myu hku nna shaw ai hta lai wa sai 2011 ning majan hpang wa ai kaw nna
United Nationalities Federal Council UNFC hpe rai tim Myen mung dan nga myu baw
sang law law hpe woi zinlum nna mung masa ning gam shatsaw na lam hpe woi awn
galaw wa sai rai nga ai.
KIO/KIA gaw 2011 ning kaw nna hpang ai majan laja lana
re lapran hta tai hpyen wa hpe mung tinang lu ai atsam hte mung chying mung
shawa hpyen hpung hte rau rai nna ning hkap let gaga myu sha rawt jat lam
masing amyu myu hpe mung woi zin lum galaw taw nga ai rai nga ai. Ndai zawn mau
hpa atsam jaw ya ai gaw Karai Kasang nan rai nga ai. Karai woi awn galaw ai
KIO/KIA hpe anhte wunpawng myu sha ni yawng hkungga ra ai, dai zawn hkungga ai
lam gaw Karai hpe hkungga ai hte maren rai nga ai. KIO/KIA du salang ni byin ai
majaw, ram ai majaw nrai Karai kaw na anhte myu ni hpe tsawra ai marang e
KIO/KIA hpe hpung shingkang jaw ai, mau hpa atsam jaw ai majaw, dai chyeju hpe
n malap mai nga ga ai.
Kachin State Progressive Party KSPP gaw 2015 ning hta
mi rai rai, galoi rai tim anhte myu sha ni a pan dung hpe shachyaw sa wa ai
shaloi myit dam lada ai hte, mung chying mung shawa yawng a nsen hpe madat let
lahkrip ra ra rai nna woi awn galaw ai lam gaw manu ai masing langai rai nga ai
lam mying ntsun ai KIO salang nkau ni a ningmu hpe tang madun dat ga ai law. Dai
hte maren KIO/KIA ni woi awn nga ai UNFC hpe rai tim mung masa hte myu baw sang
law law a gam maka hpe woi awn galaw ai lam hta dam lada ai zai ladat hte
zinlum woi awn na hpe Jinghpaw Wunpawng Dimokresi Ginrun Party hku
nna ra sharawng ga ai lam mung tang madun dat ga ai law.
Myu sha lam hta
Matut mahkai hkring dat
Jinghpaw Wunpawng Dimokresi Ginrun Party
