Shawang Myiprwi

Myitrum manang ni, “Shawang Myiprwi” ngu ai Ga shagawp gawp dat ai yaw. 10.1.2013 shani gaw, Yunan Mungdaw, Yingjang, Mangshi de na Hpunau sai rum Wunpawngsha ni Modo 100 jan masha n-gun 1000 jan hte anhte hpe n-gun sa jaw ma ai raitim, jarit hpundung din nga ga ai re majaw, shanhte a Miwa hpyenla ni shingdang kau ma ai. Shingrai anhte hpang de n lu du ma ai sha, dai Nabang mare kaw sha yan dan nna, marawn lata galam shakram hkat ga ai; shanhte gaw jan du ten hta nja nhpra hkrap nna wa mat sai hte maren, anhte mung hkrap shajang ga ai. 11.1.2013 shani grau tsan ai de na ni Nodo 300 jan hte bai du na nga ai majaw, anhte mung hkyen lajang da ai lam nga ga timung, shanhte Yingjang kaw na n lu lai mat ai lam sha na lu ga ai.

            Bai, 11.1.2013 shani ka-ang 1:00 – 2:00 PM lapran Awng Ja gasat poi kaw M helicopter 1 rocket hte gap bun nga yang, Hkaya bum anhte a post kaw na helicoper hpe lu gap jahkrat kau dat ai; Grawgrabum maga de di hkrat jinghkyen bang mat wa sai lam Shawnglam Share Ninghkring ni kaw na shiga na lu ai. Awng Padang a matu kyu matut hpyi ga yaw.

                                    JIC

Shawang Myiprwi

10.1.2013 gaw,
Kachin State Day re ai law;

Daini wa gaw tsinyam hkrum,
Myit kaji let shyoi mi chyum;

Hkrum hkam sha ai tsin-yam wa,
Tsun n dang she hkam sha ra;

Chyahkrai dik ai zawn she ngu,
Lamu de chyu sharawt yu;

I hpe garum na kanang?
Karai lai kadai n ngang;

Dai zawn amyit kaji ten,
Nabang hkran de nsen ren;

Miwamung na Wunpawng ni,
Wora hkran e sa ningdi;

Myit hkum daw mu!
Shakut mu!
Karai hkye la na re!
Nachying Tsawra ga ai yaw,
Nja nhpra dik ai law;

Wora hkran de mada yu,
Masha shada n hkrum lu;

Jarit hpundung mi din tim,
Tsawra sin dun ai n sim;

Wunpawng sai jarit n nga,
Annau ni wa le…. i ya.

Shawang Myiprwi sha mayut,
Nepsan kapya sha katsut;

Lata sha pyi n lu matut,
Myit hta kadai mung n-gut;

Karai Padang jaw ya na,
Myit shaja ta mu lu yaw ya….. da oi.

Shanglawt Tsing

(11.1.2013,