Laiza Grup yin

Myitrum Manang ni, “ Laiza Grup-yin” ngu ai Ga shagawp shagun dat ai yaw. Kabu gara shiga shana mayu ai. Mani tup mana tup anhte akyu jawm hpyi ai lam, Wa karai madat ya sai. M ni gasat ai lam gaw, Jamani majan hta pyi grau ai da yaw. Myawk auto hte second mi pyi n hkring ai gap dumbre ai; majan pa kaw myawk marang htu ai hpa she re da. LZ kaw na mung adan sha na lu ai. Mani tup n sim n sa gap bun ai majaw, anhte de na si hkrung si htan hkala nba loi mi law mat ai. N dang hkam ai majaw, loi mi hting nut kau tim ten dep garum n-gun bai du ai majaw, ningsin sin sai hpang e lu gap htingnut kau dat lu sai. M ni bum lagaw de htingnut mat wa ai lam kabu gara na chye lu ai. Mani kaw na jan du lup kyu hpyi ninghkring Sarama 2 gaw sengke hte Hkayabum du hkra, akyu sa hpyi jahtau ma ai; jan du yang she Nawku jawng de bai du wa ma ai. Haleluyah! Chyeju shakawn ga yaw. Dai tsadan ni gaw shayawm na n re, naw matut mazut na mara ai. Ya na hta htamhtau grau naw akyu hpyi shaja ga i.

Chyeju Shakawn let,

                               JIC

 Laiza Grup-yin

Laiza grup-yin shinggrup da,

Karai jaw ai bum ni wa;

Hpunpyen bum - Lakang bum,

Ntap bum – Bumre bum;

Lungrawk bum – Hangkai bum,

Laiza grup –yin a salum;

Prat tup ngang ngang grin nga ai,

Anhte a bum ni hkrai hkrai;

Daini wa gaw tsadan du,

Laba ka – up kashun m’yu;

Hpyen luksuk kaba hte rau,

Pyenli kaji kaba gau;

Sinat laknak ahpan hkum,

Shani shana gap dumbrum;

N yen kau yang si na tai,

Yen kau ya ra bum ni hkrai;

Hkayabum langai chyu sha,

Sari makawp na shara;

Aten tup wa ninghkap da,

Myu tsaw Brang ni a ningja;

Mungmasha ni akyu hpyi,

Makam masham hta ningdi;

Awng Padang anhte lu na,

Annau ni shakut ga i ya…….

Shanglawt Tsing

( 25.1.2013, 1:00AM)