Chyurum Wunpawng Sha Ni Yawng Hpang De

KIO/KIA hpe roi ai, manya shadu ai, yu kaji ai hte ladu shalai masu ai myen asuya gaw ya kalang bai Wa Mung Pang Sai kaw mung masa bawng ban na nga nna myit katu taw nga sai re. KIO/KIA hpe ladu lai hkra Laknak n-gun, masha n-gun, nbungli, labu bawm ni hte gap shadang la nhtawm "mung masa bawng saga, nang sum sai" ngu ai lachyum rai nga ai. KIA post nkau yen kau ra mat ai gaw KIA ni sum mat na nre, mara nlu ai myen hpyen ma ni ladu shalai si ru wa ai majaw, hte mung masa zai ladat gasup na matu yen kau ai she re. Nbungli ni hte myawk kaba ni kade gap tim KIA hpyenla ni hpe hkra ai lam nnga ai daram re, KIA ni gap dat ai ntai nmai re pala ni chyawm myen asuya dap Du Kaba ni, Du ni, hte hpyen ma law law si sum mat shangun sai re.

Dai majaw Laiza makau grupyin na Bum ni hpe yen kau ai mung sum mat ai rai nre, gan hkring sa la ai masa she re, hpyen zai ladat galai na matu she rai na re. Dai hpe Myen asuya dap ni gaw ladu shalai kabu gumrawng marawn jahtau rai nga ma ai, dai gaw shanhte bai hkrat sum na kumla rai nga sai.

Tara nlang ai myen dap ni gaw mung masha ni a dum nta mare ni hpe atsai sha wan nat jahten kau ya ai lam, Num sha ni hpe hkum shan roi rip sat kau ai lam, mung masha ni a U, Wa, yam nga ni hte arung arai ni hpe majoi mya la htaw la kau ai lam, mung masha nga ai mare kata de laknak kaba majoi bap bang nna mung masha law law si hkala hkrum mat ai lam, ndai lam ni gaw shabai kau nlu mat sai labau hka tai nga sai. Galoi mung wunpawng sha ni a kraw salum kata, labau hta rawng nga sana re, dai majaw myen hte bai pawng na ngu ai gaw Jinghpaw Wunpawng sha ni yawng kachyi pyi myit nhkawn mat sai lam re.

Karai Kasang gaw anhpu annau ni hpe rai n-kabai kau shi ai, Shi anhte hte rau naw rai nga ai, awng padang lu na matu sum machyi ai lam hpe shawng hkam la ra ai, dai hpang she Jet ai Awng Padang lam de du wa mai nga ai. Yesu Hkristu Mung dai zawn sha re, Tsadan wa hpe padang dip na matu shi hkum hkrang hpe shawng si hkam sum machyi kau ra ai, dai hpang she Awng Padang Dip la lu ai re. Dai hte maren dai ni anhpu annau ni machyi tsinyam hkrum sha nga ai gaw kade nna yang anhte a hpyen wa hpe Awng Padang Dip lu na npawt nhpang nan rai sai. Dai majaw myit nkaji n-gun nyaw mat ai sha Chyurum Wunpawng sha ni yawng myit n-gun atsam dat let KIO/KIA hpe lam shagu hta dang di lu ai maga hku nna atsam htum hkra jawm madi shadaw sa wa ga ngu lajin dat ai rai. 

By/ Myu Tsaw Kasa

 Blog