Myitrum Manang ni, mani
(26.1.2013) shiga hte daini (27.1.2013 Laban) na Hkayabum majan shiga shana dat
ai yaw. Mani shani ka-ang e gaja sha Hkayabum gasat poi kaw Tai ni bom nau gap
ai majaw, n dang hkam nna Myutsaw Brang ni bri jawng ma ai; Tai ni gaw, gun
smoke ni mung lang ai da. Dai majaw, n dang hkam nna htingnut mat ai. Laknak ni,
KRL ni tawn kau da ai; dai lapran Myutsaw Brang ni gaw gara hku raitim, tai ni
wa madu la kau na sai nga nna, “ Tat kau saga ai” nga, Shawnglam majan pa na
shiga lu la ga ai. Raitim, anhte grai naw maram yu ai hpang she, shana de daw
kaw shiga shapoi kau dat saga ai re. Shana 9:00PM daram hta, Myutsaw Brang ni
n-gun awai la nna, shani ka-ang e tat kau ai shara de bai htim na matu rawt wa
sai lam na lu ai majaw, “Kyu hpyi ga law!” ngu, shana hkyen nna yuptung du hkra
kade shakut yu tim, connection n nga ai majaw, dai shiga hpe aten dep n lu
shana kau ga ai. Mani nbungli gaw n lang ai; helicopter hte gaw htaw wa htaw sa
galaw ma ai lam chye lu ai.
Daihpawt 6:00AM hta shiga lu la
ai gaw, mani tat kau ai Hkayabum pungding de mana ningsin kaba e lanyan lung wa
yu yang, anhte tat kau ai sinat laknak, KRL,machyu pala ni yawng, Tai ni n ra
ya ma ai; majing grim bai lu la ai; Tai ni mung marai mi pyi n nga nga mala ai.
Dai majaw, dai pungding post kaw mi na raw sha anhte bai dung nga sai lam chye
lu ai. Aten dai daram na tim Tai ni hpa majaw, anhte a laknak ni zingla nna dai
shara kaw awng padang n dip la ma ai lam gaw n chye maram mat saga ai. Bom ma
mat na kun? n chye sai. KK sha chye na sai. Chyeju shakawn ga. Mana LZ hpe majen
nna, masin kahpra mat ai, myiprwi pru kau ai ni gaw, Shawnglam Share Ninghkring
hkrai rai saga ngu shakawn dat ai. Ya hpang de raitim, pugang sin machyi rai
nga ga oi. KK gaw, annau ni a sindun nga ai tsawra myit hpe manu shadan masat
masa galaw ai hku nna, Awng Padang jaw na re kamsham ga.
Ma kaji ni a ana ahkya ya grau
grau sawng wa nga sai. Ma ni a matu kyu aja awa hpyi na shadum dat ai.
Chyeju
dum let,
JIC
