Daini anhte WPsha ni Majan kaba tsin-yam hkrum nna, Myit kaji garen hkrum hkra nga ai aten hta nan, n myit mada ai; anhte a tsawra hkungga ai; Sasana Kanu shingtai sha ngam sai; Ma Ma kaba Crider hpe Yesu woi la sai lam na dat ai shaloi, kalangta masin hta hkra nna, yawn kaba hte myit kaji jat na zawn ngu hkamsha kau dat sai.
Ndai laika ka ai wa gaw, 1955-56 hta Kuthkai NCS Sasana jawng kaw jawng kaji lung hpang ai rai nna, Sara kaba yan Ma Ma Crider grai naw hkalung yang mu kau dat yu ai wa rai nga ai. Ngai naw kaji nga yang na Shingran hta Sara kaba yan Ma Ma grai tsawm ai; grai simani ai; Tsawra shingni hte hpring tsup ai hpe sha ya du hkra myi kaw shingran naw mu nga ai re.
Mai byin yang, shan yan hpe daini anhte WPsha ni ru yak shoi chyum, tsin-yam hkrum nga ai ten hta anhte hte rau asak naw hkrung shangun mayu ai. Shan a tsawra myit alum nga ai namchyim hte, shan a kyu hpyi garum ai n-gun jaw ga ni hpe shan a n-gup hte naw tsun n-gun jaw shangun mayu ai re. Ya gaw n mai byin mat sai.
Raitimung, anhte WPsha ni hpe, KK hpe chyu sha manoi let, asak hkrung nna, KK a Hpung Shingkang shadan shadawng lu ai Amyu ni tai nga na matu shadum sharin kau da ai n-gun jaw ga ni hpe bai nhtang myit dum let, KK hpe kam sham yang, Mungkan ga ntsa na ru yak tsin-yam tsindam yawng hpe tawt lai lu nna, Awng Padang anhte lu la na re ngu, myit mada let, tsawra ai Ma Ma Crider hpe ndai laika hte hkungga jaw dat ai rai.
Ma Ma Sumsing Ja Mungdan kaw Madu Yesu hte rau Ngwi Pyaw Simsa nga u ga law.
