Myit Shaja

  Myitrum Manang ni, “ Myit Shaja” ngu ai Ga shagawp shagun dat ai yaw. Pangwa de shani shagu nbungli hte gasat ai. Hpakant de gasat poi ni bai byin nga sai. Sumprabum de mung, majan byin nga sai. Hkawanbang kaw Myu tsaw Brang ni awng padang lu ai. Hkaya kaw lu shingdang da ding-yang re. Mana de bai htaw lung wa ai; M hpyenla nnan ni hta Labu amut (apya) nsam bu ai ni lawm ai hpe Hkadap ni du sai ngu, maram nga ga ai. Hkadap sha n ga, Kaning re nat mi du du anhte lu shamyit kau hkra kyu hpyi shapyen bun na re; Shawnglam de na Myu Tsaw Brang ni n sim n sa shakut nga ai zawn, hpanglam de na anhte kanu kawa ni mung, n sim n sa kyu hpyi shakut nga ga ai. Kyu hpyi ai gaw Wpsha ni yawng mai shang lawm nga ai hte gajawa mung, shang lawm nga ga ai majaw, tsadan wa kaya kaba katut maw sai. Matut shakut ga i.

                                                                                                                                                                                                                                  JIC

Myit Shaja

Myu tsaw mung tsaw,
Share shachyaw;
N yup n sha,
Grai she pu ba.
Shingran raw raw,
Myi hte chyaw chyaw;
Share Ninghkring,
N-gun da ting.
Hkayabum post,
N mai ginlut;
N sim n sa,
Ninghkap ai da.
N-gun ding-ren,
Ninghtoi she hkren;
Tai ni wa gaw,
Lagat zawn law!
Kaya n chye,
Tai wa share;
Nte hpe wa,
Nbungli she sa.
Adip arip,
Laba shakrip;
Myit htum myit si,
Kaning n di.
Jahtum Chyalai,
Shi myit htum sai;
Hkying hkum hkun mali,
Masat ten ni.
Lai she lai wa,
Shi masin hpra;
Ga gaw tat kau,
G’sat gaw n rau.
N lu n da,
Shakri na gya;
Ten garawt da,
Myit shaja tawn ga lu yaw ya……

Shanglawt Tsing
(24.1.2013,12:30PM)