Nahpaw Kaw Mai ” a labau kadun hte, “Tsawm Ningli”

   Myitrum manang ni, “ Nahpaw Kaw Mai  ” a labau kadun hte, “Tsawm Ningli” Ga shagawp hpe shagun dat ai. Shiga gaw, anhte 2-3 ya nni nhkri akyu grai hpyi let chyeju shakawn ra na ga ai. M ni gaw dinggam-yaw zawn wunawng wuwa she kaput lung wa ai. Kaduk htu mung grai lawan ma ai da. Dung 23 hte bum lagaw e shanhte shara la kau masai nga ma ai. Kyu hpyi ai hta lai, anhte laknak kaga n lu ga ai yaw. Anhte hpe kadai mung, “Maw! Ndai M hpe gap mu” nga nna, lak nak kaba sa hpai jaw na n rai.

                                                                                                                                                                               JIC

--------------------------------------------

NAHPAW KAW MAI A LABAU KADUN

Nahpaw Kaw Mai gaw, Slg: Nahpaw Tu hte Hpm: Hpaudaw Kaw yan a kasha rai
nhtawm, March 19,1937 hta, Nahpaw bum e shangai wa sai. Jawng lung ten hta,
Nahpaw bum kaw tsang I du hkra, Manhkring kaw tsang IV du hkra matut lung la ai.
Lapran tsang hte Lahta tsang hpe Yangung, Union Baptist Hight School kaw, 1954 – 1959
lapran sa lung nhtawm, 1959 ning e, tsang 10 (B) hte awng la sai. Dai hpang, BSC (Kan
bau hpaji sharin ai collage jawng) laning mi lung la nna, laika dip jak jum ai kan bau hpaji
hpe awng la sai.

November 12,1960 hta, sara kaba Maran Brang Seng hte hkungran nhtawm,
1963 hta, Sara kaba Maran Brang Seng Myu tsaw dap de lahkan shang mat wa ai hpang,
Myen asuya e, hkyuk htawng sharawng da ai mung hkrum sha sai raitim, ningrum
ningtau wa a ntsa myit n daw ai sha, 1967, June hta, kasha alat Seng Gu hpe dun nna,
nam de shang nang mat wa sai re.

1978 hta, KIO Amyu Shayi Hpung nnan hpaw hpang wa ai kaw na 2007 du hkra,
Amyu Shayi Ningbaw tai let shakut shaja lai wa sai. Ningbaw kaba Brang Seng Mungsang
Mungmasa hte Maigan hkrun lam hkawm sa ai shaloi mung, hkan shingdep shingtau
lawm ai majaw, Maigan mungdan 10 daram mung du hkawm yu sai rai lu ai.

1992 September, October lapran galaw ai 8 lang na Wunpawng Mungdan
Shanglawt Ginjaw Komiti Hkrum Ra Zuphpawng hta, Amyu Shayi kaw na shawng nnan
Ginjaw salang tai wa ai gaw, si ten du hkra rai nu ai.

----------------

Tsawm Ningli

Ahpraw tsawm a maling,
Myu Shayi a ningtsing;
Galoi mu tim amajing,
Nahpaw Kaw Mai shi a mying.

Wunpawng Mungdan Shanglawt,
Amyu Shayi Hpung Ningpawt;
Ginjaw Komiti Ningbaw,
Shaning 39 galaw.

Kasi kaja law madun,
Grit nem kawn tsaw de shalun;
Maran Brang Seng ningrum wa,
Hpaji jaw ya grai kaja.

34 ning dinghku de,
Ga li ga law n nga chye;
Shada gaja chye tsaw ra,
Ten shagu nja nhpra.

Ruyak jamjau kade hkrum,
Rawt malan prat tup amyit rum;
Shada hpadi hpadaw hkat,
Kashu kasha law shaprat.

Kanang du yang shi hkan du,
Ningbaw kaba grai kabu;
Lani mi 3 lang kyu hpyi,
Yawng hpe madun ai kasi.

Mawn sumli lam n lagawn,
Makam masham lam loi shawn;
Kaji gadun n lata,
Yawng hpe tsawra myit hpra hpra.

Kasi yu la ging ndai,
Myu Shayi ni malap n mai;
Daini majan hkat ninglen,
Nang hpe dum let myit garen.

Awmdawm mu da mayu nga,
Nang tsun da ai ga ni wa!
Myit dum let shakram dat ai;
Wa nu yaw--- Nahpaw Kaw Mai!

Shanglawt Tsing

(3.1.2013,)

Hkungga Jaw Ai