MAT WA HKYEN SAI.

1-Mung masa.

Mungkan hta masha daw wa daw tsa hpe si shangun lu ai zawn kalai shai lawan dik shangun lu ai gaw mung masa tara hkrang masing rai nga ai.mung masa tara hkrang kalai shai ai masing a jaw masha law law gaw ninghkap ninggun madun si hkam ai zawn maga mi de masha law law hpe kalai shai sha ngun nga ai .

2-Makam masham.

Dai ni makam masham a majaw mung masha law law si ru nga ai zawn masha law law kalai shai nga ai .makam masham n’bung ai jaw langai hte langai hka bra,n’htuk n’htak hpyen tai sat sharu hkat nga ga ai zawn langai hte lngai n’chye hkat ai ga n’hkrum myu n’bung lamu ga mungdan n’bung ai tim rau u hpung nawng hpawng de galung nawku lu nga ga ai.dai ni makam a jaw chyalai shinggan myit masa ni pru wa ai jaw makam n’bung ai ni hpe myu htum sat sharu nga ma ai.ya ten mying kaba dik ai ISIS Isil hpung ni hpe kasi hku sawk sagawn yu la mai nga ai.dai hte maren madu a kabu kara shi ga a majaw mung masha sen wan lam kalai shai nga ai .

3-Du hkra ladaw hte ana zinli.

Mabyin du hkra ladaw hte ana zinli a majaw shinggyin masha urum byin hkrum hkra chye nga ga ai zawn masha law law gaw n’gaw htawt prat kalai shai ra mat chye nga ai .du hkra ladaw kalai shai ai a marang e n’bung laru n’nang nawn,wan hpyen,hka hpyen,ni byin masha law law gaw chyahkring na jan hte sha siru sihtum mat ai.
Dai ni anhte shinggyin masha ni shadu nga ai gaw hpyen majan ana zinli a majaw masha malawng si hkrung si htan hkrum ai ngu sawn la nga ga ai re kaja nga yang n’dai majan a ningpawt hpe bai sawk sagawn yu ga nga yang madung gaw du hkra ladaw kalai shai ai hpe shinggyin masha ni gaw n’dum shami yu shalai kau ai zawn byin nga ai .dai gaw dai ni anhte mungkan shinggyin masha ni htum mat wa hkyen ai a madung manghkang ningma rai nga ai.
Mungkan a shawng na labau shingdu labau ni hpe bai n’htang gawn yu ai shaloi mungkan e nga prat lai wa ai du sat ni dai mat mat wa sai zawn anhte shinggyin uhpawng n’kau mi mung dai zawn byin lai wa nga sai re ya mung byin matut nga ai.[DAINUSAW-KINGKAWNG -GAWZILA] zawn re du sat nigaw hpa majaw mat htum ai kun?
Mungkan lamu ga gaw shangai jat n’lu ai hta n’ga lani hte lani pyi grau grau yawm wa nga ai raitim shinggyin masha nig aw lani the lani shangai jet lu sha jahpan jat rai gat law gun rai malu masha ni gaw lani hte lani grau manu jahpu rawt grai hpu wa nga ai ..dai ni shaning 50 ning hta mungkan na mat mat wa chye ai chyarang hta annau ni mung lawm nga saga ai kun?dai mawru kaba hta annau ni du kabye nga saga ai re.mungkan a labau mau moi ni hpe n’htang shen ding lit yu n’na annau ni mung lawan wan sharai shading la ra nga saga ai.du nga ai mabyin masa hte du hkra ladaw hpe yu maram ra ai zawn byin chye ai anna zingli gaw kara kaw na byin wa chye ai hpe ningpawt gawn hpaji mu ra nga saga ai.du hkra ladaw kalai shai shangun dik ai gaw bum maling mala ni hpun kawa krin wa ai majaw hte sut n’hprang rai ni tara n’lang majoi joi htu shaw hpun majoi kran maling shaza ai a jaw mungkan a manu dan dik ai du sat ni mungdan lamu ga shinggyin masha ni mat htum ma wa ai re.dai ni gaw sau dumlawng jakrung bunghkrawng ni a jaw mungkan gaw lani hte lani grai kahtet wa nga ai du hkra ladaw kalai shai lawan wa ai zawn hkai n’mai machyi ana zinli ni grau law wa nga ai .dai majaw mungkan a mat mat wa hkyen ai a ningpawt gaw mabyin du hkra ladaw re.majan a ningpawt mung dai re.annau ni dum ra sai.
Dai ni annau ni gaw sharawng ja ai myu rai ga ai re jaw masha ga ga sharawng ai.masha lai hpe htang kaba dum ai.dai ni masha kaba ni jinghpaw ga jet jet hte mai shaga nga ninglen maigan ga ga shakut ai maigan ga matep yang she tangdu dum ai dai gaw mat mat wa hkyen ai jahpan hpe n’gun jaw ai n’dum shami myu hpe dut sha nga ai hte bung ai.dai ni annau ni hpe maigan ga law law hpe shangai la n’na tinang myu ga jet hte mai shaga ai tim sara kaba masha kaba law law gaw masha ga shap ga dum yang she AI-nawn ai,htang kaba ai tang du dum ai ni gaw myu shamat mayu ai ni,mayam jahpan bang la ai ni re.lawan sharai ra sai.lawan galai shai ra saga ai.ga mat htunghking labau rusai mat yang gaw teng 50 shi ning pyi grai n’du yang mat mat wa na rai saga ai law.dai hta grau yak ai gaw lamu ga krin lamu ga zai bru jang byin mat wa yang gaw n’kam mat tim shi hkrai mat mat wa ra na sha re.
Hpun maling hpun kawa majoi n’kran ga.mungdan hpe shawng tsaw ra yang she myu sha ni myu hpe tsaw ra ai ngu mai tsun ai.mungdan lamu ga jahten sharun nga yang kara kaw nga na.n’kam matsan tim matsan ra sai n’gaw n’kam htawt tim htawt ra ai.galaw lu galaw sha shara n’lu wa yang kara hku rawt jat na.manu dan ai lamu ga n’hprang rai du sat ni shi hkrai mat mat na.lai wa sai shaning hkying 2-3 a mungkan hta byin lai wa sai labau ginshi ni hpe hti maram yu maram ai shaloi hpa majaw annau ni gaw mat mat wa hkyen ai jahpan hta lawm wa hkyen ai kun ngu ai hpe maram sawn mu lu na re.dai majaw MAT WA HKYEN SAI ngu ai laika ngau hpe matut sang lang na n’ngai.masha myu kaba masha law ai amyu ni gaw masha kaji kadun ni hpe myu gayau mayu jahtum wa nga ai .dai hta grau ai gaw du hkra ladaw hte mabyin ana zinli ni gaw mu nga ninglen mat htum wa chye ai.
Jinghpaw laika hku lachyum hpe sang lang ai shaloi ga yan laika yan ni grai galu ai jaw kalang naw matut ka sang lang na n’ngai.hkung ga ai.Annau ga hpe manu shadan ga.laika ga ning nan ni hpe gyin shalat prat hta hkan n’na mabyin masa du hkra ladaw hpe masam maram n’na rawt jat sa wa ga law.
Baren Numraw.