1. Hkrat sum mat sai share shagan ni hpe myit dum let anhte a hpyen madung kadai re hpe dum ga.
2. Mung masa lam ladat n bung, hkawm sa lam n bung tim amyu bung ai annau ni Bandung bung nga ai majaw shadada n htailai ai sha madi shadaw myit hkrum mang rum rai sa ga.
3. Nawku makam bung, hkringhtawng bung, kaji kawa rum ai annau ni hkrang kaji kajaw shai ai hpe chyu nau hkum htailai, myit hkrum myit rum let Karai a man hta shadada tsawra let akyu jaja hpyi ra ai ten rai sai.
4. Hpung woi Sara ni, Hpung woi ningbaw ningla ni mung hpung masha ni hpe shadada hka bra na baw policy hkum shapraw, mungga hte ga hkum tsun, laika hkum ka, wenyi kung jat lam she hkaw tsun ga. Karai a myi man, amyu a myi man tau let shadada lachyen lahka ai lam n galaw ai sha yawng hpe zinlum ga, tsawra ga, gahkin gumdin let Karai a wenyi lam hta kung jat wa na mungga she Hkaw ga, akyu hpyi na lam she sharin ya ga.
5. Mung masa ningbaw ningla ni mung shadada myit hkrum ga. Ningbaw ningla shadada hpyen n shatai ga. Mung masha ni hpe myit shut shangun ai baw n tsun ga, n galaw ga. Lachyum n pru ai Myen hpyen wa a maw lanyet kaw aten n shama ga. Hpyen n gun, laknak n gun shagreng let Awngdawm Shanglawt de she woi anut na matu zai ladat shaw saga.
6. Kanu mungdan kata, mungdan shinggan nga ai Jinghpaw Wunpawng sha ni yawng shadada n bung ai hpe chyu nau n yu, shadada ahtu na hku chyu nau n azi ai sha myit hkrum lam hpe tam, myit rum lam hpe shakut, amyu lam hpe tau Karai a mungga hta machyu chyung let gahkin gumdin saga ngu yawng hpe saw lajin dat ai law.
