Aten : 5:00 - 9:00 P.M
Trinity Hotel, DFW, Texas, USA.
Texas kaw (53) Lang na Rawt Malan Poi Galaw
Dallas/Fort Worth, Texas, USA hta shanu shingbyi nga ai Chyurum Jinghpaw Wunpawng Myu Sha ni kawn (53) Lang na Rawt Malan Poi hpe wu wu di di kabu gara galaw la lu ai lam shiga na lu ai. Poi lamang hta KIO Tingnyang Up Ningbaw Kaba Zawng Hra a "Rawt Malan Mungga" hpe n-gun mi alu madat hti hkam la lu ai hta n'ga KIO/KIA Ginjaw Magam gun Dukaba Nbang Bum Sin Wa kawn Phone hte laksan shatsam n-gun jaw mungga kadun tsun shana shagrau shanglawm wa ai lam hpe mung na lu ai. San Francisco, California, USA kaw nna laksan du sa ai Duwa Howa Ja La kawn KIO/KIA atik labau hte daini na anhte Jinghpaw Wunpawng Sha ni hta byin hkrum hkra taw nga ai Mungmasa lam yan ni hte seng nna tsun sanglang lai wa sai lam mung na lu ai. Lamang hta du sa ai shawa masha ji nban yawng lata gindun let Myu hte Mungdan a matu aja awa akyu jawm hpyi la lu sai. Myu sha myit sharawt "Yu-ngwi Pinra", hpyen yen tsin-yam "Gamung Naura" madun ai lam hte Htunghking manau ka manawt ai hte "53 Lang na Rawt Malan Ninghtoi " Poi lamang hpe shagrau sha-a myit n-gun awai la let kabu gara galaw la lu sai. Poi lamang hta laga Myu Bawsang (Hkang, Kayin) ni mung sa du let shawa masha yawng 300 tup shanglawm ai lam mung poi shabyin shatai committee kawn na chye lu ai.
