Srm:Nding Tawng Ra, Ma Ma Crider, Rev: Dr: Crider, Sr. Npawt Brang Mai(PutaO)
“Ma Ma Crider A Labau Sumhting Hte Hpang Jahtum Na
Shadum Jahprang Ga”
Daini gaw, anhte a Chyeju madu tsaw ra hkungga ai Ma Ma Jean S. Crider
a hpang jahtum makoi mayang nhtoi rai nga mali ai. 16.2.2013, 10:00AM ten hta
shi a dum nta, Westmister Woods, Huntingdon kaw akyu hpyi hpawng galaw la
nna, makoi mayang sa wa na re lam chye lu ga ai hte maren, shiga na ai anhte
Wunpawng Jinghpaw ni mung, akyu hpyi myit dum nga ga ai re.
Sara Kaba Rev. Dr. Donald M.Crider gaw, 2009 January 28 e, shawng
wundoi mat wa sai. Ma Ma gaw, anhte Wunpawngsha ni majan tsin-yam kaba
hkrum nga ai ten, 2013 January 21, asak (86) ning e Madu Yesu woi la ai hte
wundoi mat wa sai re. Ma Ma gaw, kasha shadangsha 4 hte Jinghpaw kasha Labya
La Doi (Myenmung) hte rai yang marai (5), kashu marai (9), shumashi (4) ni hpe
ngam kau da wu ai.
Kawa George W. Supplee, Kanu Ruth Lamberton yan e, 1926 July 19 hta,
India Mungdan, Assam Mungdaw Kohima kaw shaprat dat ma ai. 1947 June 25
hta Sara kaba Donald M.Crider hte dinghku de sai. India, Woodstock International
Boarding jawng kaw na awng pru nhtawm, Chicago, Wheaton College kaw na
Yungwi Shingni Hpaji B.A Janmau hpe lu la ai. Dai majaw, Ma Ma a yungwi
nsen hte Radio kaw mahkawn mangwi ni mung shapoi lai wa sai; Radio Yungwi
Ninghkring mung rai nga ai.
Ma Ma yan Sara Kaba gaw, Myen Mungdan, Sam Mung, Kutkai de KBC
shingwang hta (13) ning tup sasana Magam bungli gun hpai lai wa sai re. Ya du
hkra, Kutkai Chyum Jawng gaw, Ma Ma Crider a Music hta dawn jan ningtawn ai
asi ni law law si nga ai nga nna, KBC mungkan hta marit maroi naw gumhkawng
nga ai re. Dai hta n-ga, Ma Ma a Music jawngma dingsa ni gaw, ya du hkra
ningtawn ai Music Sara kaja ni tai shajang nga ma ai.
1966 ning hta Myenmung e, Ne Win wa a policy hte maren, Maigan
Sasana ni hpe wa kau shangun ai shaloi, Ma Ma yan Sara Kaba yannuwa ni gaw,
Wunpawngsha ni hpe nja nhpra shakram kau da sai. 1994 November hta ahkaw
ahkang lu wa ai hte maren, shan a Sasana lagaw hkang hpe bai sa gawan kau da
ma ai gaw, anhte hte hkrum ai hpang jahtum rai mat masai law. Dai shaloi, Kutkai
e tsun kau da ai shan a gahkaw mi gaw, anhte hpe nachying shadum jahprang kau
da ai; manu dan gahkaw mi rai sai. Dai gaw, “Shaning 30 laman, ya nanhte shaga
ai Jinghpawga hpe an n chye na mat saga ai” nga ai re.
Daini anhte n dum shami hka yawng, Myen e mayu sha mat wa ai hpe,
anhte Sasana kanu kawa ni maroi nni masin nsi ya nga ma hka! Anhte Sasana
kashu kasha ni gaw, Kanu Kawa ni hte tsan gang yang tsan gang ai zawn, n dum
n dam rai nga let, mayam de gale mat wa magang sai hpe Sara Kaba yan Ma Ma
shadum kau da masai re. Jinghpaw ga jet jet n chye tsun mat saga ai. Dai majaw,
Anhte lam shagu kaw na lawt ra sai lam myit dum hprang shangun nga mali ai.
Myit dum hprang saga law! Anhte a Sasana kanu yan kawa rai nga ai
Chyeju Madu Sara Kaba yan Ma Ma chye na ai moi na anhte a ga majing,
Jinghpaw ga jet jet lu tsun shaga hkra shakut ai hte mung, mayam tai wa ai kaw
na lawt wa shajang saga ngu nna, ndai shiga hte Sasana kanu kawa ni hta hpang
jahtum wundoi mat wa sai; Ma Ma Jean S.Crider hpe marit shingran mu let,
Wunpawngsha ni yawng hpe garan gachyan dat ai rai.
Shanglawt Tsing
(16.2.2013, 6:00AM)
