By-FB-Lachid Kachin's photo.
==============================
Simsa lam jahta nga ten Jinghpaw mungdaw sinna Ledo lam Nam Sai kaw jung ai KIA post hpe Myen asuya dap ni lai wa sai lahkawng ya, Feb. 11 ya shani gasat zing la ai lam chye lu ai.
Nam Sai post hta Wunpawng Mungdan Shanglawt Hpyendap (KIA), Dapba 2 npu Dapdung 14 kata, MHH (Mungshawa Hpyen Hpung) hpyenla ni nga ai re lam, dai ginra na KIA shiga lawk tsun ai.
Myen hpyendap, Dapnu Masat 33 npu, Hk.L.Y Masat 297, Hk.L.Y Masat 298 hte Hk.M.Y Masat 318 pawng hpawm dap ni n-gun 200 jan laba ka-up akajawng sha wa htim gap ai majaw, dai post shara hpe yen kau da ra mat ai re lam, KIA shiga lawk tsun ai.
Mani bat Lahkawng Ya shani hta asuya hpyen n-gun 200 daram gaw Myitkyina maga kawn Danai (D.K.Ts hpyendap daju) de mungmasha hpun palawng bu hpun nna, cycle (carry) hte du lung wa ai lam, mi-chyaw-mu ai Danai buga masha ni tsun ai.
Bai ya ten, Myen hpyen n-gun 300 daram gaw Hpakan Ginwang (Dung -6) hte Hugawng Ginwang (Dung-14) ginra lapran na, Loi Mye Bum lagaw, Hkada Hka hte Shayit Hka grup yin kaw shamu shamawt nga ai lam hpe mung matut na chye lu ai.
Maga mi de mungdaw a sinpraw maga Pangwa jarit sin dap ginra de mung Myitkyina kaw nna asuya hpyen n-gun, laknak n-gun ni hpe helicopter nbungli ni hte shaning n’nan kaw nna lahka bang nga ai gaw ya ten du hkra re lam, Myitkyina buga masha ni tsun ai.
Ndai shata htum wa de Myen hte KIO datkasa ni kalang bai simsa lam bawngban na re hta, maga mi de KIO gaw tinang dap ni asuya dap hpe dasang sa htim gap ai lam n galaw na matsun tawn ai aten, Myen hpyendap gaw KIO dap zing ai lam ni, shawnglam ginra ni de hpyen n-gun jat bang ai lam ni dingyang galaw nga ai re.
Myen asuya a ndai sat lawat hpe yu yang, KIO/KIA hpe maga mi de mungmasa bawngban na jahpai nhtawm kalang bai laja lana gasat shamyit na masing re nga nna hpyen masa yu maram ai ni tsun nga ai re.
Yuzana company sun na sinat kaba ni Jahtu Zup de lahka bang
Hugawng Pa kaw hkai sun galaw ai Yuzana company wang kaw makoi bang tawn ai Myen hpyendap a sinat kaba hte machyu pala ni hpe dai ginra na hpyendap ni de ndai laman lahka htawt bang wa sai lam chye lu ai.
Mani, Feb. 12 ya hta Wa Ra Zup makau Yunaza company wang na laknak kaba hte machyu pala ni hpe Jahtu Zup mare Hk.L.Y Masat 297 hpyendap de mawdaw ni hte lahka htawt bang sai lam, ginra buga masha ni hpe lakap let chye lu ai.
U Hte Myit ningbaw ai Yangon daju Yuzana company gaw, Myen asuya a alak mi n-gun jaw makawp maga ya ai npu, Hugawng Pa lamu ga eka 200,000 jan hpe 2006 ning hta zing madu la sai. Dai lamu ga hta Sharaw Madat Gaiwang mung lawm ai re.
2011 ning June shata kaw nna Myen asuya hte Wunpawng Mungdan Shawnglawt Hpung (KIO) lapran majan byin wa ai hpang, Hugawng Pa, Yunaza company sun wang kata amu galaw masha ni hpe alak mi hpyen wunkat jaw ai lam ni hte laknak shakap ya ai lam ni hpe ginra asuya dap ni galaw wa sai re.
