Ndai ga baw hte seng nna, Jinghpaw
Wunpawng shani yawng sung sung myit ging sai. Gap hkat jahkring ai nga
yang, grai simsa ngwi pyaw wa na zawn nga ai rai tim, anhte Wunpawng sha
ni a matu grau grau hkrat sum wa ai lam she byin wa nga ai. Alang hte
alang simsa lam bawng ban ai ten hta, Myen gaw n gun kaba hte htu anin
wa ai hpe mu nga ai. Grau ahkyak ai shara de madu la wa ai. Akyak ai
shara kaw lung tsap nna, grau grau htim gasat wa ai. Simsa lam bawng
shagu grau kaba ai hpyen n gun, grau kaba ai laknak, n bungli, shing ja
bawm hte dip gamyet gasat wa ai hpang jahtum February (4) ya shani
bawngban ai simsa lam a majaw, Laiza hpe shing grup nna, Myen dap ni hpe
shara jahkrak da ya ai zawn rai mat nna, Laiza Ginjaw Rung hpe Myen a
lata lahpan kaw bang kau ya ai zawn she rai mat sai.
Bai, Uru Seng Maw Dap Ba (2), Dap Dung
(6) ni a up hkang ai ginra na seng htu seng shap mai ai ginra ni yawng,
Myen ni a lata de htawt bang kau ya mat wa sai majaw, galaw lu galaw sha
nga ai mung masha ji n ban ni grai myit n pyaw mat ai, grai myit daw ai
mung masha ni mung nga ma ai. Mung masha ni gaw Shanglawt ni a matu,
Mungdan lu na matu n sim nsa akyu hpyi nga ai rai tim, Ginjaw Salang ni
gap na ahkang n jaw ai majaw, Dung (6) hpyen hpung ni, Myen ni hpe
padang dip la na malai, shada ahpum shakram hkat nna, Dung (6) ginra hpe
ap kau manu ai. Uru seng maw ginra yawng Myen hpe ap ya kau masai. Mung
masha n kau mi myit daw nna akyu gara hku matut hpyi na pyi n chye mat
ai ni nga ma sai. Kaja wa hpyen hpe hpyen hku mu nna, gap gasat na
ahkang lu ai rai yang, n dai zawn dap ginra ni myen hpe shayaw kau na
lam nnga ai. Dap (6) ni a share shagan ai magrau grang ai hpe mung shawa
yawng mung chye ai. Kam ai re.
February zahapwng a hpang, Putao, Sumpra
Bum lam, Sam Mung lam, Danai Hugawng lam, Pang Wa lam, Laiza makau grup
yin de mung Myen ni gaw n gun kaba jat da lu masai. Anhte a shanglawt
ni gaw myen salang ni a ga madat nna, nga ai shara kaw na n mai shamu
ai. Padang dip la na shara kaw pyi n mai gap ai majaw, shalai kau ra ai.
Anhte a Shanglawt ni a matu hpa baw amyat lu la saga ai i? Bawngban
shagu Myen ni a matu gaw amyat, myu sha ni a matu gaw a sum hkrai rai na
malai, n bawngban yang pyi grau kaja na n hten. Rai yang, simsa lam nra
yang mung Myen gaw Jinghpaw ni simsa lam hpe n ra ai ni rai ma ai nga
na mung masa amyat htuk mungkan de n dau na ni rai ma ai. Dai majaw mung
masa bawngban na gaw galoi mung ra ga ai ngu nna, shapoi n htawm anhte
Jinghpaw hte sha n re, myu bawsang ni yawng lawm ai, UNFC hku she bawng
sa wa na hpe ra sharawng ga ai ngu nna, shalai dat ra ai. UNFC gaw myu
baw sang ni, myit langai, yaw shada ai lam langai, ahkaw ahkang langai
sha byin wa lu na matu, ningpawt re majaw, Myen ni grai hkrit ai re.
Anhte bawsang ni yawng n dai UNFC hpe grai ngang kang hkra gaw gap ra
ai. N dai UNFC a majaw, lani mi myen mung gaw jet ai munghpawm byin tai
wa mai ai re majaw, Myen a ladat gaw, n dai UNFC hpe lu hkra jahten mayu
na mara ai. N gup hte she simsa lam ra ai zawn, myit hkrum ai zawn nga
tim, UNFC hpe ayai aya, dum bru, dum bra, rai hkra galaw kau mayu nga ai
hpe anhte tau nna chye da ra ai.
Dai majaw gaw, Myen ni shara kaja de
n-gun kaba jat da mai ai gap hkat n jahkring ai sha, anhte shara kaw
kadai hpe mung n yen ai da hpran tsap nga let, simsa lam bawngban na
matu, UNFC hku nna hkrai bawngban sa wa yang gaw anhte myu sha ni a
matu, grai htap htuk kaja na re ngu ngai langai a ningmu hpe shapraw dan
nngai. Myen mung shanglawt lu ai hpang kaw na dai ni du hkra a mahkrum
madup hpe yu jang Myen tsun ai hpe galoi mung n mai kam ai. N-gup kaw na
simsa lam tsun tim, Jinghpaw myu sha ni hte simsa lam hpe lai sai ten,
ya ten hte htawm hpang galoi mung n ra ai ni re. Shamyit kau na chyu she
ra nga ai ni re majaw, UNFC n gun grai kaba wa nna kaning nan n di lu
ai shani she, myu bawsang ni hte jet ai simsa lam la mayu wa na ma ai.
Laiwa sai ten lut daw a shinggan kaw naw
re ten hta, “n tara ai lam yawng hpe gum lau kau mu” nga Democracy rap
ra ai tara hpe n ten kaw noi da ai majaw, mungkan shara shagu na Hpa jan
Mau, nya Jan Mau lu ai shagrau kum hpa law law hte Democcracy Mu Nu Jan
mau hpe gup la lu ai, Ma Kaw jan hpe mung Myen re majaw nmai kam sai.
“Ntara ai lam ma hkra hpe gum lang kau mu” nga tsun lai wa sai rai tim,
dai gaw shi tara shang atsu ya masha rai n rai yang tsun ai she re. Bai
shi a myen myu masha ni a matu tsun ai she re majaw Democracy mu nu
mying me she lu tim hkum kam. Anhte a matu n lawm ai. Anhte Wunpawng sha
ni hku nna, shi hpe ya mung, htawm hpang de mung hkum myit mada. Shi
tsun ai ga nga ai. “Atsu ya hpe shingdu dat nna, Jinghpaw ni a maga tsap
na gaw n tsun ya lu ai. Ngai la ma Jinghpaw ni maga tsap nna tsun ya
yang Hpyen atsuya ra na i?” da. Ndai ga hpe na ai hte shi hpa baw re,
kaning re masha re ngu ai hpe anhte chye la ging sai. Democracy mu nu
langai gaw, dai ni ra nna, waw ra ni n ra nna ngu tsang ai majaw, nkam
tsap ya ai. N kam tsun ya ai” ngu na lam nnga ai. Kadai gaw kadai hpe n
tara ai hku dang sha dip sha nga ai, roi sha nga ai hpe yu nna, n tara
dang sha hkrum, dip sha hkrum nga ai wa maga de tsap nna, rap ra ai lam,
tara ai lam maga hku tsap nna, tara rap ra ai hku makawp maga tsap ya
na matu sha ra ai. Dip sha hkrum nga ai, n tara ai hpe chye nga ninglen,
maga mi de na n ju n dawng na tsang ai majaw n tsap ya lu ai ngu ai
gaw, Democracy mu nu langai a myit masin n re. Jinghpaw Wunpawng sha ni n
tara sat nat hkrum sha nga ai mu nga ninglen, hpyen atsu ya shangun
yang she, Shanglawt ni kaw na hpyi shawn wa yang she shang garum na ngu
ai gaw, masha shagu mai galaw ai lam sha re.
Ndai ni hpe maram yu ai shaloi gaw, Ma
kaw jan gaw, anhte hte jinghku ndaw ai, kahpu kanau mung n daw ai, anhte
matu kachyi mi mung myit ai wa nre. Kawa a ga sadi majaw, prat tup tsin
yam hkrum sha nga ai ni hpe dang lu ai maga hku nna, garum la na ngu n
myit ai. Dai majaw Wunpawng sai jet ai wa Ma kaw jan hpe kachyi mi mung
hkum myit mada. 2015 ning ra lata poi hta Gumsan magam byin n hten nga
myit mada nga ma ai. Gum san magam byin tim Wunpawng sha ni matu gaw
kaga mi n shai na re. Gumsan magam mung nmai byin sai. Hpa majaw,
Wunpawng sha ni a Me tset kawp n lu mai sai. Wunpawng sha ni myit hkrum
let Karai Kasang jaw ai atsam hte matut nna gasat sa wa jang, anhte a
awng padang Yehowa Karai Kasang gaw awng dawm jaw na re.
Myu hpe tsaw ra let,
Agu Namti
Agu Namti
By JPKS
