09.02.2013 (Sat) Shani New Zealand
mungdan Auckland mare kaba Aotea Centre shawng kaw New Zealand Kachin
Community ni woi awn let Wunpawng myu sha ni hte kaga myen mung kaw na
baw sang ni (Karen, Karenni, Chin, Burmese hte Jawng ma hpung) ni n gun
madun ai lam galaw lai wa sai lam na chye lu ai.
Lamang hpe 11:00am – 1:00pm aten du hkra
dai ni Wunpawng mungdan kata byin nga ai mung masa, hpyen masa lam ni
hte seng nna, Myen gum shem asuya a ntra ai majan, ma ja htim kasat ai
majan ni hpe n ra sharawng ning hkap ai lam hte Tengman ai mung masa
bawngban let ngang grin ai sim sa lam hpe hkrang shapraw sa wa na matu
New Zealand mungdan masha ni hte Asuya magam gun ni mung dip n gun jaw
nang na matu n gun madun hpyi shawn lai wa sai lam hpe mung na chye lu
ai.
New Zealand Kachin Community kaw na n
dau laika hpe mung shapraw let seng ang ai asuya magam dap ni de mung
tang shawng mat wa sai hpe na chye lu ai.
Ndai n gun madun lamang hta Jinghpaw
Wunpawng myu sha (40) jan hte kaga bawsang ni (50) ram rai yawng (90)
jan sa du n gun madun lai wa sai hta n-ga New Zealand Journalists ni
mung shiga sa la ai lam na chye lu ai.
Ya yang New Zealand mungdan kaw Jinghpaw Wunpawng myu sha ni yawng (150) du nga sai.
By JKPS
