Myen Asuya Hpyen N-gun Ni Grau Grau Shamu Shamawt Wa

Ya yang myen asuya dap ni gaw KIO/KIA hte simsa lam bawng na nga nna shani shagu ndau nga ai rai tim, myen dap ni gaw htingnut dawm la ai lam nnga ai sha n-ga Jinghpaw mung de hpyen n-gun grau grau she jat wa nga ai lam na chye lu ai. Mani January 31, 2013 ya shani hta Jinghpaw mung Myitkyina mare kaba kaw na myen asuya dap ni gaw hpyen mawdaw 100 jan hte sumpra bum lam hku nna bai rawt mat wa sai lam na chye lu ai, mawdaw (50) ram gaw Pangwa Kampaiti lam maga de man yawngmat wa nna, (50) ram gaw Puta-u maga de man yawng mat wa sai lam na chye lu ai.

Bai Manaw Loije lam maga de mung myen asuya dap ni hpyen mawdaw kaba (19) tup hte Zinlum Bum maga bai rawt lung mat wa sai lam na chye lu ai. Ndai zawn myen asuya gaw myit nsan seng ai hte KIO/KIA hpe simsa lam bawng ga nga saw lajin nga ai re hpe asan sha mu mada lu nga sai, dai majaw ya yang KIA hpyendap mung grai sadi maja let koi yen nlu majan ni a matu laja lana hkyen lajang nga ai lam na chye lu ai.

By/http://myutsawkasa.blogbaker.com/