Hkan Nang Na

yitrum Manang ni, “Hkan Nang Na ” ngu ai Ga shagawp ka shagun dat ai yaw. Mani mana gaw LZ grai sim sa ai. Lai wa sai; Hkayabum majan an nga ai ten hta kajawng kaja rai, gan yen hprawng hkawm mat ai mare masha kau mi bai nhtang wa nna, pat da ai lusha seng ni, gat seng ni mung wa hpaw shajang nga masai. Jawngma ni mung Ma Shapan jawng kaw na hkawt, Jawng kaba du hkra bai hpaw nna, jawng lung nga ai bat mi jan wa masai. Matut nna simsa mat nu ga hte, ya M ni gaw Kanpaiti maga de shamu shamawt nga ai lam a matu, anhte a Myu Tsaw Brang ni hkap manga kau lu mu ga akyu hpyi ga ngu, loi sha mi shana dat ai.

                                                                       JIC

________________

Hkan Nang Na

-----------------------

Wa e, Nang majanpa sa yang,

Ngai hpe hkum kau da;

Ngai mung hkan nang na nngai.

Wa e, Nang LUCIFA hpe gasat yang,

Ngai hpe shaga rit;

Ngai mung shang lawm na nngai.

Wa e, Majanpa e ngai hpe ningtawn shangun rit,

Ngai hpe ningjap ningja jat ya rit;

Ngai atsam shapraw na nngai.

Wa e, Nang myusha ni a matu amu galaw yang,

Ngai hpe shangun rit;

Ngai kangka hteplahti galaw na nngai.

Wa e, Majan sum wa yang, myit kaji chye nngai,

Ngai hpe myit n-gun shaja ya rit;

Ngai ajawa shakut na nngai.

Wa e, Tsawra ai ni si ma wa yang,

Yawn dukrung dung mat mayu nngai,

Ngai hpe shalan la rit;

Ngai n-gun awai la na nngai.

Wa e, kawsi hpang gara yang,

Nsa hti na zawn ngu gawng kya la nngai.

Ngai hpe mada mara rit;

Ngai n-gun dating nna, myit nden shaja na nngai.

Wa e, kyu hpyi magang hpyen law magang rai yang,

Ngai myit daw la nngai,

Ngai hpe shadaw shangang rit;

Ngai, Nang hpe dep hkra hkan nang na nngai.

Wa e, shiga nau kahtet yang, myit shawshishap wa nngai,

Ngai hpe myit sadi dung shangun rit;

Ngai, Na a ga madat na nngai.

Wa e, ten shagu Nang hte rau rai mayu nngai,

Ngai hpe hkum jahti da et;

Nang hte htep htep hkan nang na nngai.

Wa e, Nang, LUCIFA hpe dang hkra ngai gasat lawm mayu nngai,

Ngai hpe wenyi wan shagrung ya rit;

Ngai, Nang hpang maga lawm na nngai.

Shanglawt Tsing

(2.2.2013, 5:20AM)