Myit Malai

Myitrum manang ni,  “Myit Malai”ngu ai  Sumroi ka shagun dat ai yaw. Manmaw de na shiga, sanghpaw 4 ting M hpyenla ni tup lung  wa mara ai da. M ni jat chyu jat rai nga sai lam na lu ai. Taimhu galai sai hte maren, Byuhamhu ni mung galai na rai malu ai da. Majan plan jahkrat byin dik ai hta grau byin ai wa hpe lata nna Kachin mung de dat na hku hkyen nga ma ai; Shanhte a shingte masat daju N0. (1) LZ . (2)Hpakant. (3) Pangwa rai malu ai da. KK makawp maga la rit ga, hkum ngau shagu Kyuhpyi shaja ga lu oi. Ya shanhte Laiza grup-yin e hpyen-la mahkawng nga ai ten re. Dai majaw anhte kyu hpyi n-gun grau kahkyin ra sai ngu kahtap shana dat ai oi.
jic read more click on+++++++

Myit Malai

Myit malai lu nngai. Ngai naw kaji ten hta, Kahtawng ting Wunpawng
Jinghpaw hkrai, makam masham gaw, Hkalup Hpung hkrai pri re ai shara kaw nga
kaba lai wa ai re. Asuya tsang 4 jawng nga ai. Dai kaw jawng lung wa ai. Jawng
kaw sharin ya ai majaw, anhte Wunpawngsha ni hta, Maru, Lashi, Rawang, Lisu,
Jinghpaw, Zaiwa ngu nna kahpu kanau ni hpan 6 nga ga ai lam atsawm sha chye da
nngai.

Manmaw mare kaba e, jawng bai matut lung yang, Lisu hte Zaiwa manang ni
lu wa ai raitim, shanhte mung ngai hte maren, Jinghpaw ga sha shaga ai majaw,
Wunpawng hpu nau ni a ga hkaw mi pyi n chye la kau sai. Kaba ai kanu kawa kaji
kawoi ni mung, hpunau ga shada chye tsun shaga hkat ra ai lam kadai mung, n tsun
shadum sharin shagwi ma ai. Tsang 10 shaning Myitkyina du sai. Makau grup-yin e
Jinghpaw ga sha lu ga ai. Sara tai ai hpang Waingmaw e Jawngsara galaw ai.
Waingmaw gaw, hpawm chyawm shara re majaw, Lisu, Maru, Lashi, Jinghpaw,
Zaiwa hpan 5 gayau gaya nga ai. Ma ni hte shani shagu hkrum shaga ai a marang e,
Lisu ga hte Maru ga loi mi chye wa ai. Raitim, Manmaw ga de bungli bai htawt mat
wa ai shaning law law a hpang e, Kachyi mi sha chye la ai; Lisu, Maru, Lashi,
Zaiwa ga ni yawng bai malap sha kau sai.

Ya ngai asak kaba sai. Nye a prat hpe dinglik yu yang, tinang Wunpawng ga
shaga na malai, Myen ga she n lawm n mai matep shaga lai wa sai. Myen e ka-up
sha kau ai hkrum nga nngai hpe dum nga ninglen hka yawng let, asak kaba mat wa
ai hpe myit malai lu nngai. Ngai hte rau ram manang masha kaba ni hpe bai maram
yu yang mung, ngai hta grau sawng ai ni hkrai she rai taw nga ai. Daini ndai majan
byin ai kaw na she, “ Oh! Myen a Ushat she tai nga saga ai” ngu, myit dum hprang
mat ai hku re. Myen gaw annau ni 6 aga n bung ai a ninghkan, sumprat dawk bang
tik tik rai nga ahka!

Pangwa de na Lashi ni, tinang Wunpawng ga gaw n chye, Myen ga gaw gaja
chye she rai nga ma ai. Htaw! Putao de na hpu nau Rawang ni mung, kaga
Wunpawng ga gaw n chye, Myen ga she ga shajang nga ma ai. Ngai Jinghpaw ga
hte shaga yu yang, “ Kachin sagah nah male bu!” she nga ma ai.

Ngai wa gaw taw? Ngai wa mung maren, Myen ga hpe sha manu shadan
matep ga lawm si bu nga nngai. Ya she myit malai lu ai. Moi kaw na ngai Myen ga
ga shakut na malai, tinang Wunpawng ga hpan 2,3 daram sha pyi atsawm lu tsun
shaga taw gaw, ngai Maru shing kaw, Lashi shing kaw shing n rai, Zaiwa shing kaw
mungga hkaw tsun yang kade sha tang du na i. Wunpawng sha ni shada Wunpawng
aga yawng she chye na chye ga hkat ai rai yang, annau ni kade she myit hkrum
zinlum kahkyin gumdin, tsaw ra makyit sumri ngang kang hkat na ga ai i. Ya gaw,
dai hku n rai; shada numla wenyi hka garan nga saga ai. Dai zawn, annau ni n zen ai
majaw chyasam wa sumprat dawk bang grai loi mat nga ai. Hpunau Hkang ni amyu
ga hpan kade law tim, shada chye tsun chye na hkat ma ai.

Tsadan gaw annau ni hpe sumprat dawk nna, kahkyin gumdin n- gun hpe
shakya kau ya nga ai. Oh!……. ya ngai myit malai lu ai zawn, hpu nau ni yawng
mung aten dep myit malai lu shajang ga le ……i. Amyu ga gaw, shada grai tsaw ra
kahkyin gumdin lam hpe manu jahpu n jaw ra ai sha, kahkyin gumdin shangun lu
nga mali ai. Daini Tai wa gaw, Myen ga shaga mat ai Buga mungchying sha ni hpe,
shanhte a yuptung jahpan hta, bang la kau ai majaw, Myen amyu gaw, wan kade
wode rai sai nga nna, Mungkan de shakawng ndau nga ma ai. Tinang amyu hpe
tsaw ra ai rai yang, tinang Wunpawng ga she aja awa ga shakut saga yaw. Hpanwa
Karai Kasang gaw anhte hpe Myen n tai shangun ai re myit dum ga lu oi…………

Shanglawt Tsing

(21.9.2012,1:00AM)