Monday, September 24, 2012

JINGHPAW WUNPAWNG MYU SHA NI A URU SENGMAW LAMU GA MYING NI HPE MYEN GA HTE GALAI SHAMYING WA AI.

 Jinghpaw kasa hta hpribum hpe Kadai Taung ( hpri bum) ngu nna, ka da
ai hpe mu lu ai. Ndai laika ka ai hpe mara shagun ai lam tsep kawp
nnga ai.  Jahpring shazup ai lam sha rai nga nngai. Wunpawng myu sha
ni tinang a lamu ga, ginra labau ni hpe jaw ai hku tup hkrak ntsun
dan, nhkai dan, laika ka ka sara ni nka lang wa ai majaw, daini na ban
hta nga pra wa ai Jinhpaw Wunpawng ramma ni gaw, Myen asuya wa woi
shamying ai, hkai hkrat wa ai mying ni hpe madung tsun mat wa ai mung
rai nga ai.
Hpushawng hpuba, kaji kawa ni labau hpe jaw ai hpe jaw ai hku, hkai
tsun dan na matu nmai lagawn nga sai. Asak naw hkrung nga ai laman,
hkai dan tsun dan shakut shaja ra nga ai.
Myen asuya (န၀တ )a prat kaw na ndai hpri bum hpe ကတိုင္းေတာင္ shamying
wa ai shaning 20 ning jan na sai hte maren Uru Seng Maw ginra hta
ကတိုင္းေတာင္ ngu nna sha, tsun jahta wa ai rai nga ai. Myen asuya gaw
Hpakant hpe စကိုင္းတိုင္း de lawm ai hku nna mung, shakut taw nga ai
re.
JAUKANG LA MUKHKYU HTE HKAW SENG BUM A LABAU KADUN
Shawng daw na Jinghpaw Wunpawng sha ni a kaji kawa ni tsun hkrat wa ai
Jinghpaw mau mwi hta lawm ai gaw,  Uru seng maw hta gajai gumhkawng
dik ai, "JAUKANG LA MUHKYU" ngu ai, ga sadi dung dik ai, shan gap jau
gawng langai mi sin nga lai wa ai shara re. Dai shara hpe “ HKAW SENG
BUM" ngu ai re.
Jaukang la muhkyu wa gaw, shan gap sa na ngu ai nhtoi hta e ga sadi
tawn da let rawt sa wa ai. Dai shani shani hta e shan la hpe sha gap
na re, ngu hkam la let sa wa aten hta shani tup shan yi hkrai hkrum
tim, shan yi langai mung n-gam ai sha bai nhtang wa ai. Shan gap jau
gawng rai tim, ndai zawn ga sadi dung dik ai hku sak hkrung lai wa re.
Ndai hpribum hta, Jaukang la mukhkyu a mam htu sha ai, nlung htum
langai mung nga ai. Dai nlung htum hpe Myen asuya (န၀တ) a prat hta
lawu Myen mung de lu hkra htaw yu mat ai lam ni hpe mung na lu ai.
Ndai gaw, ngang kang ai Jinghpaw wunpawng myu sha ni hkai hkrat wa ai
labau hpe sak se hpe shamat shaprai kau ai ladat rai nga ai. Jaukang
la mukhkyu a lam hpe kaji kawa ni hkai hkrat wa ai gaw law law nga ai.
 Matut nna, galu galang ntsun sai.
Rai yang ya daini Uru SengMaw hte hpakant lam lapran na Jinghpaw hku
shamying da ai mying ni hpe Myen ga hku gale kau ai lam ni nga ai. Ga
shadawn, 1. Lunghkang hpe လံုးခင္း 2. Hkrai dun hpe တံတားညီေနာင္ ngu
shamying mat wa sai. Ndai zawn laika ka ai wa nmu nchye ai sara  law
law hpe mung Myen asuya wa mying galai shamying ai lam ni law law nga
na re. Myen asuya gaw anhte a labau shamat na matu shakut shaja taw
nga ai lam ni rai nga ai.
Dai majaw  tinang amyu sha ni a masat masa (Identity) mying hpe mat wa
magang ai de ndu hkra gaw, jaw ai labau amying shingteng ni hpe tsun
shaja nga ga, hkai dan nga ga,  ngu nna saw lajin dat nngai.

Slg. Nwawt Naw Awng
24/9/2012