MUNGMASA PENSION KUN

KIO/KIA NINGBAW NINGLA, MUNGCHYING KANU KAWA, NAWKU HPUNG
HPA-AWN NINGLA, LUSU KUMMI MAHKRA NI HPANG DE

GINLAM:- SALAT KATSUT JAHPU KUN? MUNGMASA PENSION KUN?

2012 Ning, Sept. 18-19 jahpawt na lu ai radio shiga hte maren, ndai laman Myen
mungdan kata na mungmasa hta kung kyang ai masha nkau mi gaw, America mungdan de sa
nna, mungmasa pension hkam la ma ai lam, matut manoi shiga na lu ai. Anhte Wunpawng
myu sha ni hta ndai pension hkam la ai kadai mung n lawm ai majaw, yawn na zawn, myit
kaji na zawn hkam sha shajang na ga ai. Raitim masha ni dai zawn mungmasa shabrai hkam
la ai a ntsa, manawn masham ai hku n myit la ga. Shanhte hkam la ai gaw, salat katsut jahpu
sha rai kun! Shing n rai tengman ai mungmasa galaw ai majaw ging dan ai manu jahpu rai na
kun!
Anhte Jinghpaw Wunpawng amyu sha ni gaw, marai langai hkrai arawng lu na matu
mungmasa galaw ai n rai; galaw yang mung wuhpung wuhpawng hku nna galaw nga saga ai.
Ndai bungli gaw, ya aten Hpyen Yen Dabang (IDP) hta lawm nga ai ni hte, dai (IDP) hpe
zinlum n-gun jaw akyu hpyi ya rai let, du na aten hta anhte a matu Karai Kasang kaw
apnawng ai myit jasat rai nga ai. Anhte hpe manu jahpu jaw na wa gaw, maigan mung na ni n
rai; sumsing lamu na Karai Kasang she rai nga ai. Anhte lu la na shabrai gaw, amyu sha
yawng jet ai ahkaw ahkang hpe arau sha hkam la lu na matu rai nga ai.
Ya ten anhte a buga ginra yak hkak ai shara hkan e, shakut shakat rai, n-gaw n wai
shawang myit masa kumla she madun dun rai; ganaw hkawm nga ai jahtawng n htu ai ni
hpe, sadi maja koi yen kau na malai, hkan bawp awlaw lawm ai ni mung nga shajang ai hpe
mu lu ai. Hpa n chye ai ni rai kun ngu yang, buga kanu kawa, masham masham hta Hpung
woi sara, lu su nga mai ai masha, yawng e yu mada kamhpa tawn ai ni du hkra, hkan kataw
nang, hkan gumpye nang, hkan aba nang nga ma ai. Shanhte hpa baw maw lanyet shachyai
nga ai hpe n sawn yu; tinang ginra lawan simsa ra sai ngu ai ningmu chyu; tinang angawk
taw nga ai hpe n mu; jasam wa a lagat ntsin chya ai mahkam de shang kabye du nna, amyu
ting, mungdan ting hpe hka rum de woi di hkrat si na hku she rai wa ai mung nga shajang ai
hpe mu lu nga ga ai.

SADI NA LAM:-
Ndai aten hta anhte a mungmasa hkrunlam hpe kashawt shangun ai masha ni hpe sadi
ra na nhten! Dik nna '88 hpung ni mung, rai la na zawn zawn, anhte a hkrun lam hpe kashawt
shangun na ni rai ma ai nhten! Shanhte gaw maigan mungdan kaw na Myen mungdan de bai
wa nhtawm, mungmasa galaw na shara n lu sai majaw, ganaw hkawm ai ni, shara tam ai ni
she rai ma ai nhten! Dai the maren, anhte amyu sha ni a rudi buga rai nga ai Shanglawt
Mungdan hpe gaw gap ai wuhpung wuhpawng hpe adawt ayai kau na ni she rai ma ai nhten!.

Dai re majaw:-

* Sadi maja let maram masam yu nga ga.
* Anhte a Ginjaw Ginra, Dap jung ai shara ni de shanhte hpe n sa shangun ga.
* Anhte a Dap Up, Hpa-awn ni hte n hkrum shangun ga.
* Ya yang anhte gaw, ram ram kahkyin gumdin nga chyalu rai sai. Shanhte a majaw
ayai aya bai n byin hkra sadi ga.
* Akyu hpyi ai lam hta myit hkrum nga ga law.

Uru Mungnawk