Jinghpaw Wunpawng Mungdan hte Mungdan sha ni a matu “Nbung Dat Kasa” rai nga ai Laiza FM hpe daina maga de shapoi hpang sai re lam chye lu ai.
Karai Kasang a shaman chyeju san san hte sha daina maga 19:16 ahkying aten hta shawng ningnan awng dang ai hte shapoi lu sai lam chye lu ai. Daina tup gaw FM Radio shachyen mahkawn hpaw da na re lam hpe Kachinlandnews shiga dap kaw na sagawn la lu ai.
Laiza FM Radio hpe FM 89.5 MHz hta madat hkap la lu ai lam mung tut e chye lu ai. Ndai FM 89.5 MHz hpe Myitkyina, Manmaw hte Laiza grupyin hkan madat mai sai lam chye lu ai. Myitkyina de gaw Pa-ta-mya FM hte ni htep nna loi mi gayin rim nhtawm madat hkam la mai ai lam hpe chye lu ai.
Ya na zawn shapoi hpang lu ai marang e, Jinghpaw Wunpawng myu sha ni a matu “Nbung Dat Kasa” kaja tai nhtawm mai kaja ai akyu ara, shiga, hpaji jaw lam ni hte Jinghpaw Wunpawng sha ni a masin salum hpe ahpawt ya lu u ga ngu Kachinlandnews shiga dap kaw na arawng la let hkap tau shagrau dat ai.
By: Kachinlandnews.com
