Monday, November 4, 2013

Myit yu ga “Daw” (3/Matut)


Kachin Politics and Mediation Research Network
Jinghpaw Mung Masa hte Htingram Sawk Sagawn Hpung
Gara mahtang kaja dik rai ta?
Ethnic Armed Conference galaw hpang wa ai hte rau Myen a mung masa

            Anhte Jinghpaw Wunpawng myu sha ni hku nna, woi awn galaw ai myu baw sang zuphpawng ndai gaw tara shang, labau shang rai nga sai. Ndai shingran kaja gaw, Karai kaw na jahkrat ya ai masing kaja langai rai nhtawm, anhte Myu baw sang ni a mung masa pinra hkram hkrawn galu kaba pri manyen tsawm htap wugut gu, kung hpan dam lada, ngang kang masan sa na pan dung de yawng wa sai hkrang kaba langai nan rai nga sai.

        Mung maden Myen wa gaw anhte myu baw sang ni hpe ladat amyu myu hku nna bawnu maw lanyet jai lang nna galaw nga ai gaw anhte yawng chye nga chyalu rai nga ai. Ya hte sha galaw ngut sai Ethnic Armed Conference hta Myen ni a tsun shaga ai lam Ethnic Armed Group Peace Committee hpaw na matu tsun shaga wa ai lam hte Kachin State Democracy Party KSDP hpe mung masa party galaw na ahkaw ahkang masat masa galaw dat ai lam ni gaw maga mi hku nna myit yu na lam law law nga wa nga ai.
         Ndai mabyin masa ni hpe yu dat ai shaloi maga mi mai tsun ai gaw, Myen mung dan kaw Demokresi lai ladat hpe n-gun dat taw sai ngu ai hpe mung kan de madun mayu ai majaw mung, Laknak lang hpung ni hpe mung shanhte ra sharawng ai mahkrun hta shang wa hkra ladat shachyaw taw ai masa hku mung galaw taw nga sai lam gaw asan sha den leng shangun nga ai. Ndai kaw anhte Myu baw sang rawt malan hpung ni hku nna bai nhtang tsun ging ai lam ni gaw lawu na hte maren rai nga ai.
(1)   Armed Group Peace committee hpaw ai hte rau mung maden Myen ni mung 2008 gaw da tara hpe ningnan bai ka hpajang na committee hpaw dat na ga ai ngu ai ga sadi
(2)   Ningnan bai ka ai hta mung rawt malan nga ai hpung shagu na salang ni hpe shang lawm nna chyaw gaw gap ga ngu ai ga sadi
(3)   Mung masa bawng ban ai lam hpe madung tawn nna, Myen hte ethnic group ni hkrum jahta na shawng lam ma hkra hta mung masa bawng ban ai hpe sha madung hku nna galaw na ngu ai ga sadi
(4)   KIO/KIA hte gaga rawt malan hpyen dap ni hpe State Defence Force shagreng mat wa lu hkra garum n-gun jaw mat wa na ngu ai ga sadi
(5)   Panglung ga sadi hte maren Myen hte rau pawng hpawm nna nkam nga ai rai yang mung daw mung dan ni hpyi garan nna nga na hpe myit hkrum ga sadi jaw ra ai.
(6)   Mung masa hte pang lung ga sadi hpe mahta nna bawng ban na ga ai ngu ai ga sadi
Rawt malan ai kaw nna mung dan asuya hkrang shachyaw sa wa ra ai lam
      Rawt malan ai ngu ai gaw prat ban hte ban galaw taw ai baw nrai nga ai, rawt malan ai ngu ai shara kaw nna mung dan gaw gap asuya hkrang masa de gale hkra galaw ra ai lam rai nga ai.  Dai majaw mung dan langai a asuya hkrang masa byin hkra gaw mung dan a ningpawt ninghpang gaw da tara (shr) Constituion nga nan nga ra sai masa rai nga ai. Mung dan gaw da tara hkrang hpe shachyaw da lu ai rai yang, dai mung dan a ningpawt ninghpang gaw da tara hta hkan nna mung chying mung shawa masha a ra sharawng awng ai pan dung ni hpe mung hkum tsup ai hku hparan lajan lu na rai nga ai.
      Anhte myu ni, daini du hkra rawt malan ai ngu ai masa hta naw nga nga nna dai shara hta tsap nga nmai nga ai, rawt malan ai ngu ai gaw asuya hkrang masa hku nna hkawm ai manu hta grau nna asuya hkrang masa de gale wa lu hkra gaw gap na gaw grau nna htap htuk manu ai aten rai nga sai. Dai hte maren mung masa party hpaw nna mung masa hpe galaw nga ai Jinghpaw mung masa party shagu mung dai pandung hta shang tsap nna jawm shakut ra ai.   Awm dawm asuya hkrang gaw kaja dik htum rai nhtawm, awm dawm asuya hte seng ai ningpawt ninghpang gaw da tara mung ahkyak dik htum ai lami laman langai rai nga ai. Ndai lam gaw Wunpawng myu sha ni a asak salum kaba rai nga ai KIO/KIA asuya a gumrawng gumtsa ninggawn mung masa pan dung hta mung rawng chyalu rai nga ai.
Ndai lahta na lam ni hpe English hku nna ga gale tawn ai hpe gaw KPMRN a link kaw mai hti hkaja na rai nga ai.
     Ndai lahta na lam ni hpe matut nna bai ka shabra nga dingyang rai nga na rai nhtawm hpaji jaw, ning mu jaw mayu ai ni nga yang mung KPMRN a email kaw shagun da mai ai lam hpe mung shana mayu ga ai law.
Jinghpaw Wunpawng myu sha ni a ntsa Karai Kasang galoi mung shaman chyeju jaw ya nga u ga law
KPMRN
Email: kpmrn21@gmail.com