LAWAN LU AI RAM LAWAN RA

Mungmasa lam awngdang ai gaw grup yin a shamu shamawt nga ai mabyin masa hpe aten dep, shing n rai tau nna maram chye nhtawm lawan lu ai daram lawan ai hku ahkyak la lu ai lam rai nga ai.

Myenmung kaw masha amyu bawsang yawng ngangwi ngapyaw lu na matu asuya hte rawt malan hpung ni yawng byin mai ai atsam hte shakut wa masai raitim grau na magang hten run magang rai wa sai. Ndai zawn re ai ten hta Wunpawng Myusha ni hpe woi awn sa wa nga ai KIO Ningbaw Ningla ni gaw shalat ai ningmu rawng ai ni rai nna 2-11-2013 shani hpawng ngut ai rawt malan hpung (17) a zuphpawng hpe galoi nlu yu, tsaw htum ai mahtai lu let woi hpawng ngut wa sai. Raitimung dai gaw Myenmung madang sha naw re majaw dai madang hpe Myen asuya a madang hte apyaw sha jahten kau ya mai ai.

Ndai ten hta galaw nga ai UNFC hte Myen asuya lapran na zuphpawng ni hpe yu dat yang dai zuphpawng na pru wa ai mahtai gaw yawng lu ging rap ra ai mahtai pru wa lu na matu htaphtuk ai maigan kasa ni sa garum ra sai. Raitim dai zawn re ai mahtai pru wa lu na hpe Myen n ra sharawng ai majaw atik anang ninghkap nga masai. Dai majaw maigan salang lawm ai lachyum shadan shadawng ai hku nna UN kasa hte Miwa kasa (Yes Men) yan hpe shalawm ya masu ai hte mungkan hpe madun let Myen ra sharawng ai maga de woi shanyam mat wa lu masai. Myen ni maw lanyet ai kaw na lawt lu na matu gaw htaphtuk ai maigan masha sa shang dung lawm ai sha n rai, sa woi hparan lawm ai hte sha awngdang wa mai na re.

Ndai lam hpe maigan jinghku nkau gaw asan sha mu ya ai majaw atsang arang rai UNFC ginjaw de sa du ai lam nga wa sai. Raitimung, UNFC hpung na mungmasa hpaji ninghkring nkau gaw shanhte hta grau dam lada ai hpaji ninghkring lawm wa jang shanhte a lagaw ngangkang ai lam kaw hkra wa na tsang ai majaw hpaji loi mi madun dat ai hte shi jahtuk tawn ai ni yawng mung hkan kam ya wa ra ai marang e, Myenmung madang hta jan nna nmai lahkam sa sai majaw Myen asuya woi awn ai kaw hkan achya nang ra nga manu ai.

Mabyin masa a shingdu lam hpe maram yu dat yang, shawng de na ABSDF jawng ma ni law malawng gaw rawt malan hpung ni kaw nga wa yu ai ni rai ma ai. Shing rai rawt malan hpung ni a ningmu madang hpe atsawm chye da nga ma ai. Dai hpang ABSDF hpung shang nkau gaw maigan kaw hpaji matut sharin la ma ai rai nna, jawng ma nkau gaw mungmasa ningmu hpe maigan madang hku mu lu ai ni lawm wa sai. Dai zawn re ai jawng ma ni hpe Myen asuya gaw rawt malan hpung ni hte hku hkau nga sai kaw alu tsu jahtuk la nna UNFC hte asuya lapran kaw hpaji ninghkring hku tsap shangun nhtawm asung jashawn wa masai. Hpaji shingjawng hkat ai kaw Myen hpaji ninghkring ni gaw UNFC a hpaji ninghkring ni hta lahkam grau tsaw nga ai majaw nem ai ni gaw tsaw ai ni a npu de gashawt bang ya wa masai.

Dai majaw Myenmung na rawt malan hpung ni hta hpraw san ai myit hte maigan kaw na sa shang garum ai lam nra sharawng timung awngdang wa lu na matu hkap la ra sai. KIO Ningbaw Ningla ni gaw Laiza kaw dung nga ai hte Ningbaw Kaba Maran Brang Seng zawn Myenmung madang hpe mu dep lu ai ni re. Shing rai maigan a mungmasa gatlawk a lam mung ra yang ra ai hku jahtuk myit sumru shachyaw dat ai marang e, mahtai pru wa na re ngu kam ai. Madung gaw ta tut galaw na matu atsam rawng nga sai hpe sakse madun lu nga sai hta hkan nna dawdan galaw sa wa yang teng teng lam hku wa na re. Ahkyak htum gaw dawdan gwi ai atsam sha rai sai.

Ndai lam awngdang wa lu na matu Wunpawng Myusha ni hta na chying ahkyak nga ai zawn, Myenmung ting a matu mung hkyak nga sai. Mungkan a gara jut kaw du hkawm nga ai WP myusha raitim, myutsaw mungtsaw ni hkrai rai nga ga ai majaw tinang a Ningbaw Ningla ni hpe dangdi dangdep ai ningmu jawm jaw lu na matu grai ahkyak nga ai ten re. Dai majaw Wunpawng Myusha ni yawng jawm kamhpa jawm hti ai Jinghpaw Kasa kaw ka bang dat ai rai sai.

Myen ga hta, “Chyeju dum ai” ngu ai ga hkaw gaw shaga hkat ai kaw na pyaw na matu jahtuk tsun ai sha rai malu ai. Majan pa kaw tinang upper hand lu nga sai hpe hkala ai masha woi la lu na matu chyinghka hpaw ya dat ai hte shanhte ra gadawn nga ai laknak chyu pala, lu sha hte hpyenla ntaw ntsang hparan la na matu ahkaw ahkang jaw dat ai hte shanhte mahtang upper hand lu mat masai. Chyeju dum na malai, anya dik ai ni rai ma ai, nga nna jahpyak na masai. Kadai hpe mara shagun na kun? Lat Gyi Gawmaw Chang Ying hpe yu ga. Shanhte hpe n gasat ai wa hpe pyi gaw kade daram zing ri nna she sat ma ai. Jiwoi Jiwa ni a prat kaw na dai ni na kashu kasha ni a prat du hkra ta tut kaw chyeju dum ai jasat Myen amyu kaw rai n madun yu ma ai.

Yehowa Karai Kasang gaw Myen hte aten galu gasat hkat wa ai mungmasa hte hpyen masa a majan hpe dai ni na ten hta gasat dang la na matu lajang ya sai. Dai majaw dai ni na ten hta dang la lu ai atsam nmadun jang gaw prat chyanat hta Myen ni mahtang atsam grau rawng nna upper hand alu mat na manu ai. Dai majaw ndai hpang jahtum na majan hpe ndang nmai, Karai Kasang jaw da ya ai ahkaw ahkang, machye machyang hte nyan hpaji yawng hpe atsam htum hte lang nna woi awn gasat sa wa marit law.

“ON TO VICTORY”

Aji Pa Jau

By: JPKS