Myitkyina kaw nga ai Kachin Politics
Watch Group “KPWG” lit hkam Salang.Maran Brang Seng hte KPMRN san htai
galaw ai lam
San: Ya yang Jinghpaw wunpawng mung dan hta majan
byin nga dingyang hta KIO/KIA ni simsa lam bawng ban nga ai hpe gara hku mu
mada ai kun?
Htai: simsa lam bawng ban ai hpe garai ntsun shi yang, ngai na tinghkrai ningmu
hpe naw shawng tsun na n-ngai, ndai tsa ban 21 hta mung hpawm Myenmar mung dan
a mung masa gaw grai galai shai mat wa sai hpe mu lu ai, ngai hku nna tsun mayu
ai lam gaw gap hkat ai mung, mung masa mang hkang a majaw rai nga ai, simsa ai
lam bawng ban jahkrup ai mung mung masa rapra ai lam hpe lu la na matu rai nga
ai.
San:Anhte Jinghpaw wunpawng myu sha ni hta law malawng gaw awm dawm hpe sha
marawn mat sai, mung shawa hpyen hpung ni mung awm dawm a majaw sha gasat ai
nga nna tsun ma ai, dai hpe salang wa gara hku mu ai kun?
Htai: anhte myu ni yawng awm dawm hpe tsun shaga ra ai gaw jaw dik ai lam re,
rai tim anhte myu ni hta awm dawm ahkaw ahkang a manu gade ram kaba ai ngu ai
lam hpe atsawm n-chye ai masha ni, mung masa lam hpe atsawm n hkawn hkrang ai
ni tsun garu ai lam mung nga nga ai, bai nna nkau mi mung masa la ni tsun ai ga
hpe madat nna marawng nang ai ni mung nga nga ai, teng teng gaw anhte myu ni
mung masa hpe kaja wa hkawn hkrang chye na ra ai.
San:ya yang KIO/KIA kaw nna woi awn galaw nga ai mung masa hte simsa lam
masing hta, mung masa la nkau mi a ning mu hta san pra ai policy hku galaw
shangun mayu ai nga ai, KPWG hku nna gara hku mu ai kun?
Htai: KIO/KIA hku nna majoi hpung hpe hpaw dat masai, bai nna maga mi hku gaw
UNFC kaw nna mung simsa lam hpe ladat tam nga ma ai, KIO/KIA hpe yu dat ai
shaloi shi hkrai hpe sha dinglik na hta, UNFC hku nna gara hku policy nga ai
ngu ai hpe mahtang yu na ra nga ai.
San: KIO/KIA ginjaw salang nkau mi gaw jet ai mung hpawm (shn) federal hpe
gaw gap na lam tsun ai, mung shawa hpyen dap gaw awm dawm hpe tsun ai, ndai lam
hta mang hkang byin wa chye na kun?
Htai:Mang hkang byin na lam gaw n-nga ai, hpa majaw nga yang jet ai federal
gaw gap na rai tim, awm dawm gaw gap na rai tim, mung shawa masha hte mung
shawa hpyen dap hta sha madung ai, dai hte maren du na ra ai aten hta anhte myu
sha ni a gawng malai tai nna mung masa lam, myu sha lam bawng ban jahkrup na
dat kasa gadai hpe rai tim mung chying mung shawa ni lata san nna galaw ra wa
na re. Dai majaw mung chying mung sha ni a akyu ara n lawm ai hte anhte myu sha
ni lawt lu lam a matu nrai yang mung chying mung shawa masha gadai mung hkraw
na nre.
San: Ya hte sha Myitkyina kaw bawng ban ai simsa lam zuphpawng ngut ai hte rau
ya Chiang Mai kaw kalang bai galaw na lam na ai, salang wa hku nna hpaw baw
mahtai ni pru na re ngu sawn lu ai kun?
Htai: Aten loi la ra na nhten, ya yang ndai lam hpe tsun ai shaloi mahtai hpa
baw pru na, gara masa du hkra bawng ban lu na ngu ai hpe asan pra nlu tsun shi
ai.
By:Jame Alex
