De, Mungkan mung dan shagu du hkawm nga ai Wunpawng sha ni
Salum malai num htet ga
“MHH” HPYEN DU
Tsawra ai Jinghpaw Wunpawng kaji kaba yawng e, salum malai num htet ga hte shakram dat lu ai majaw na chying wa gabu nga ai le yaw. Anhte Nam maling e machyi jigrawng ni a mahku nsen hte nbung laru kata na marang si hkrat ai shi shi nga ai nsen kata karit gadawn ni ngoi garu ai mahku nsen hte rau, anhte KIA hte MHH share shagan ni gaw gaduk kata hta rawng wunpawng mung dan hpe shimlam la rai nna Karai Kasang bausin ai kawp e hkam ja let mung dan a makan bungli hpe lahkrip ra ra rai nna shakut nga ga ai lu oi.
Mungkan mung dan shagu de du hkawm nga ai anhte a sai daw sai chyen ni e, nanhte yawng hkamja nga myit ni? Karai Kasang galoi mung bausin lam woi ai kata hta ngwi pyaw hkamja nga mu ga ngu nna machyi ji grawng ngoi ai nsen hte rau kyu hpyi garum dat ga ai law. Yawng Karai Kasang bausin ai kawp e ngwi pyaw hkamja let tinang ra ai makan lam hpe shakut shaja rai let, wunpawng mung dan hpe mung myit dum rai sak hkrung hkawm sa nga na myit dai ngu nna myit dum let shakram dat ai law.
anhte KIA hte MHH share shagan ni, bum hkaraw ninghkap hkan marang shi shi nga ai nsen hte machyi jigrawng ni a lapran bu hpun palawng chye chye, hkepdin mung maram bam bam re ai hpe dagraw let Wunpawng mung dan hpe makawp maga nga ga ai ngu mung n-gun jaw dat mayu ai. Wunpawng mung dan hte wunpawng mung dan hta rawng nga ai nhprang sut gan ni hpe makawp maga ai hte dai nhprang sut gan ni anhte myu wunpawng sha ni a shu mashi shu masha prat du hkra nhtum nwoi ai grin nga lu u ga matu mung makawp maga mazing nga ga ai.
Anhte mungdan anhte myu sha lawt lu na matu nang ngai yawng a lit re hpe mung shatsam dat mayu ai, wunpawng sha ni rai nga ai hpe tinang du ai jut shara shagu kaw nna myit dum nga ga ngu nna mung lajin dat ga ai. Tsawra pu gang sin machyi rai nna mung dan lawt lu lam, myu sha lawt lu lam hpe da kring dalang rai nna jawm shakut nga ga ngu nna mung salum num htet ga hpe htet dat mayu ai.
G.O. C Lahtawng Zau Seng tsun da ai ga langai hte ndai lang na salum malai num htet ga hpe naw shangut da mayu ai. G.O. C Lahtawng Zau Seng htet da ai lam langai nga ai, tinang mung dan hpe nchye tsawra ai wa gaw gritnem ai myit masa rawng ai wa re, Tinang mung dan lawt lu lam hpe nchye gaw gap sa wa ai wa gadai rai tim tinggyeng myit jasat hta lup nga ai wa rai nga ai. Dai num htet ga hte maren, daini anhte myu wunpawng sha ni gara kaw du tim “ngai” gaw wunpawng sha re, “ngai” gaw wunpawng hpyela re, “ngai” gaw shang lawt hpyenla re/ share shagan re ngu nna hkam la let myu sha lam hta jawm tsap sa wa ga.
“MHH” HPYEN DU
Salum malai num htet ga
