Anhte Myu Wunpawng sha ni hta amyu lakung nga ai re, myu lakung shagu gaw wunpawng sha ni sha rai nga ga ai, dai re hte maren, ngai gaw wunpawng myu sha rai n-ngai ngu ai wa gadai rai tim, tinang myu sha lawt lam hte wunpawng mung dan lawt lam hpe tsawra ra na ga ai. Hpa majaw tsawra ra na ga ni? Tinang myu tinang ga, tinang mung dan hpe nchye tsawra ai wa gadai mung mayam prat kaw na nlawt lu ai. Tinang mung dan hpe makawp maga ai myit jasat nrawng ai wa gadai rai tim, mayam htawng kata hta naw rawng nga ai wa sha rai nga ai. Grau nna gaw mung masa galaw ai, mung masa wuhpung wuhpawng ni, mung masa party ni hpe tsun mayu ai re, tinang myu sha lawt lu lam, mung dan lawt lu lam, gam maka tsawm htap wa hkra shakut ai mung masa party ni, mung masa ning baw ningla kaja ni rai ra na ga ai.
Myu sha ni yawng hte tinang mung dan hpe mayam prat de woi ganawng bang kau ai baw mung masa lahkam hpe galaw shut na grai hkrat tsang ra ai. Shada da hkungga la ra di nna myu sha yawng a matu, mung dan a matu hkrang kaja, pri manen tsawm htap ai mung masa lahkam hpe gaw gap ra ai.
Ndai ra lata poi hta mung ndai ntsa na lam ni hpe sung sung li li myit shachyaw chye ra na ga ai. Anhte myu sha gam maka, mung dan a masa, jut shingnaw shagu hpe jahkum shatsup nna myit mang shabawn ai sat lawat akyang lai len hte gaw gap chye ai ning baw ningla ni hpe sha anhte Kachin Politics Watch and Research Network “Jinghpaw Mung Masa Yu Maram hte Sawk Sagawn Hpung” hku nna aja awa madi shadaw na ga ai.
By: Yaw Na
Kachin Politics Watch and Research Network “Jinghpaw Mung Masa Yu Maram hte Sawk Sagawn Hpung”
