Myenmung shanglawt lu ai (66) ning rai sai. Mungdan gaw lani hte lani ruyak jamjau lam law htam wa nna mungmasha ni gaw ngwi pyaw simsa ai namchyim hpe rai nlu hkam sha yu ga ai. Madung gaw uphkang ai Myen asuya gaw mungmasha ni hpe shi a hpyen hku masat la nhtawm, “Hpyen hpe lang nna kaga hpyen hpe gasat” shangun ai ladat hte mungdan hpe uphkang wa masai. Hpang jahtum myusha ni yawng hpe Myen amyu de shabyawng la lu ai shani mungdan simsa na re, nga ai.
Satan gunglau ai marang e, Kayin (KNU) rawt malan hpung ningbaw ningla ni gaw UNFC kaw na pru mat masai. Dai majaw UNFC hpe jahten sharun lu na matu kaga htaphtuk ai hkinjang shalat la ra manu ai. Laiza zuphpawng dan pru wa ai hpe ahkaw ahkang la nna UNFC hte hpawn Myenmung ting na uhpung ni ahkum ara shang lawm ai NCCT uhpung hpe dai zuphpawng kaw shalat la lu masai.
NCCT hpe majan pa shatai nna rawt malan hpung ni yawng hpe shalen la lu na matu lang hte lang zuhpawng woi hpawng wa yu timung KIO a mungmasa ningmu kaw dang nga ai majaw satan a yaw shada ai pandung de n lu du hkraw ai. Dai majaw kaga ladat tam wa masai. Shing rai 2014 June 3-5 ya hta kaga rawt malan hpung ni n lawm ai sha, Myen hte KNU ningbaw ningla ni Yangon, Ne Pyi Taw kaw laksan hkrum shaga hkat wa masai. Dai hpang KNU ningbaw ni gaw media hkan galu galang tsun ndau ma ai hpe jawm mu hti wa saga ai.
KNU ningbaw ningla ni tsun ai hta:- Gap hkat jahkring na matu myit hkrum nna sen htu tawn ai rawt malan hpung (17) rai sai. La ma hpung (30) kaw na hpung (3) myit n hkrum ai rai yang myit n hkrum ai ni ngam nga mu ga. Myit hkrum ai ni hte ta gindun nna nationwide ceasefire myit hkrum lu sai majaw Myenmung gaw simsa ai mungdan rai sai lam mungkan ting jawm chye hkra ndau mai sai. Mungmasha law malawng ra sharawng ai hte maren 2008 constitution hpe gram ra na re. Raitimung dai constitution gram na matu lam ningmaw kaw hkan marawn hkawm na malai, President hte sari sadang mi anga rai rau jawm dung let bawng jahkrup nna gram la mai na re. Aung San Suu Kyi mung constitution gram ra ai lam tsun nga ai. Shi a federal ningmu gaw kaning re ai rai wa na kun, jawm la madat yu ga, nga nna satan maga de ngang ngang tsap let ndau wa masai.
KNU ningbaw ni gaw lahta kaw tang madun wa sai hte maren satan a npu kaw shingbyi let marawn nga ma ai. Maga mi de, KNU a Deputy Commander-in-Chief hte hpawn kaga Brigade commander ni, hpyendu hpyenla ni, KNU-KNLA PC, DKBA, KNDO kasa ni hte mungmasha ni gaw lai wa sai nhtoi kadun laman KNU 6th Brigade ginjaw kaw zuphpawng hpawng nna ningmu ni garan kachyan galaw ma ai. Dai zuphpawng hta satan a lagaw lata tai let sa marawn hkawm nga ai ni hpe aja awa jawm jahpyak ninghkap wa masai.
Ndai zawn rai laika ka ai wa hku nna tang madun dat ai lam gaw kaga hpu nau rawt malan hpung ni a ntsa shatan ai n re. Mabyin masa lam majing hpe jawm chye na ya nna dam lada ai ningmu hte aten dep jawm gram sharai la lu na matu yaw shada ai gaw madung rai li ai.
Ndai ten hta Myenmung ting kaw laklai ai lam amyu myu byin wa nga sai. Lai wa sai masum ning laman Myen hpyen dap yawng (hkarang dap, nbung dap, hka dap) ni hpe anhte a mungdan kaw aja awa shang gasat shangun wa masai. Anhte a mungdan gaw panglai hte n kahtep ai. Gara hku nna hka dap hte seng wa sata! nga nna san wa ai mung nga wa sai. Madung gaw, hka dap na hpyenla mun lam sanghpaw li jawn let Man Maw du hkra lung wa nna hkarang dap hpe shang gasat garum wa masai. Dai hte maren, lai wa sai aten kadun laman hkarang dap, hka dap, nbung dap ni hpyenla mun kaba hku Yahkaing de sa bang dat nna Ruhingya rawt malan hpung ni hpe gasat ai zawn Bangladesh hpyen hpung ni hpe mung gasat nga masai.
Shing rai ndai ten hta Myendap gaw dingdung hpyen man hte sinna hpyen man de na majan ni hta ndep nhkap kyin nga ai ten re hpe jawm mu nga saga ai. Du na ra ai aten kadun hta sinpraw hpyen man hte dingda hpyen man maga ni de mung, hkra du yang na mam ting ai zawn nhti nhtang kyin wa na masa nga ai. Ndai majan hta rawt malan hpung ni maga de teng teng dang wa nhtawm mungmasha ni gaw kaja nan ngwi pyaw simsa ai namchyim hpe hkam sha lu sai rai nna "masha sa pra jaw sai" ngu hkam la let, Yehowa Karai Kasang hpe chyeju dum lu ai nhtoi teng teng du wa na re.
Shing re ai akyu ara hpe aten kadun laman jawm hkam la lu u ga matu, Chyurum Wunpawng Myutsaw Mungtsaw sha ni yawng gaw dangdi dangdep ai yi-ngam kaw shang tsap nhtawm lit la shang lawm ga. Shamu shamawt hkawm na matu n jin sai Ji Woi, Ji Wa ni gaw Karai Kasang kaw kyu hpyi ai lit jawm la let shakut sa wa ga, ngu nna kamhpa let lajin dat nngai rai.
JJ Lum Dau
By : JPKS
