"Gap Hkat Jahkring Na Ntin Ra Ai"

Myen asuya gaw hpa majaw 'nation wide ceasefire'/ mungdan ting hte tin shapun gap hkat jahkring ta masat htu mayu nga a ta?
Lawu de na mabyin masa ni a majaw re.

1) Nation wide ceasefire galaw ai kaw e, Wa n'lawm na ngu ai hpe Myen chye ai. Wa ni hpyi shawn ai, 'Wa Mungdaw' hku nnna masat ya na hpe mung Myen nkam ai. Dai majaw, ya tin shapun 'nation wide ceasefire' hpe galaw mayu nga ai a yaw shada lam gaw, Wa hpe gasat na matu re.

Hpa majaw nga yang, 1990s grup yin hta, KNU hpe gasat na shaloi, kaga laknak lang wuhpung ni hte shawng nnan gap hkat jahkring ai re. Ga shadawn, NDA-K hte 1989; Wa hte 1989; KIA hte 1994 kaw re. 1994 December shata hta gaw KNU hpe aja awa gasat sai re.

KIA hte Wa gaw ahkyak ai wuhpung lahkawng rai nga ai. Dai majaw, ndai zawn ahkyak ai wuhpung nkau mi hte shawng gap hkat jahkring ai a marang e, hpyen n'gun hpe KNU hte gasat ai poi hta n'gun shadat lu sai re. Majan hpe mung dang la lu sai.

Thein Sein asuya lakhtak hta mung, KNU, SSA, UWSA, NMSP ni hte shawng nna gap hkat jahkring ngut ai hpang she KIA hte gasat ai re. Myen hpyen asuya a dap kaba lahkawng hta lai nna, ma hkra Wunpawng Mungdaw de du nna, KIA hte gasat sai.

2) Wunpawng Mungdan Shang Lawt Hpyen Dap gaw mungdan kata kaw, Wa ngut jang numbat lahkawng ngu na n'gun ja dik ai laknak lang wuhpung re. Raitimung laknak kaba hte gasat ai majaw, KIA hku nna ahkyak ai shara law law hpe yen kau ya ra sai. A san sha tsun ga nga yang, KIA hpe n'gun shakya kau ya lu sai re.

3) Ya tsun jahta taw nga ai, "nation wide ceasefire" lamang kaw Wa nlawm ai hpe Myen chye ai. Lawm wa na nre hpe mung chye ai. Wa gaw Miwa a garum gahtau la nna, hpyen n'gun mung grau ja sai re. Wa uphkang ai ginra ni hta mung, Miwa gumhpraw hpe jai lang ai. Miwa ga hpe tarang shang ga hku tsun shaga ai. Miwa phone, Miwa internet ni hpe lang ai. Asan sha tsun ga nga yang, Wa ginra ni gaw, Miwa mungdan a ginwang langai hku nna nga taw sai re.

Ndai hpe Myen asuya gaw, chye ai. Nlu hkam sharang sai. Aten na magang, nkaja magang re. Hpa majaw nga yang, Myen mung a lamu ga hpe Miwa mung de shakap la hkyen nga ai majaw re.

Myen hku nna gaw, Wa hpe kade daram n'yu lu tim mung, kalang ta hpyen man 2, 3 hpe hpaw lu na atsam n nga ai. Dai majaw, 'nation wide ceasefire' tin shapun galaw mayu taw ai re. Ndai hpe lu galaw sai nga yang gaw, nga manga hpyen n'gun hpe lang nna, Wa hpe htim gasat sana re.

Dai majaw, Wunpawng Mungdan Shang Lawt Asuyua hku nna, tinang amyu sha ni lu ging ai ahkaw ahkang nlu ding sa gaw, gap hkat jahkring ai lam n'galaw ga. Wunpawng myu sha ni yawng mung, Myen ni a zai ladat ni hpe ga ja let, tinang Wunpawng myu sha ni a matu akyu rawng ai magam bungli ni hpe jawm galaw nga ngu nna, tang madun dat nngai law.

Zung Ring
2 June 2014.