Myen auya hte laknak lang Rawt Malan hpung ni a lapran simsa lam tam komiti ningtau ningbaw Aung Minn gaw shat sha hpawng ga’ang kaw na hkyi Makai (or) hkyi makai gam garan ya hkawm ai wa rai nga ai.
Aung Minn wa hpai garan ya hkawm ai HKYI MAKAI hpe Rawt Malan hpung nkau mi gaw MUK MAKAI shadu nna mungdan ting gap hkat jahkring sign shawng htu mayu kyin gadau taw nga ma ai. Ga shadawn KNU/KNLA hte RCSS/SSA ni gaw Aung minn wa hpai hkawm ai hkyi makai hpe muk makai shadu nga ma ai.
Thein Sein wa gaw dai hkyi makai hpe n manam hkawn hkra atsawm sha shachyip shakya mawn sumli tawn nna Rawt Malan hpung ni hpe tsun shanyam ap ya na matu Aung Minn wa hpe lit jaw shatsam tawn ai rai nga ai. Dai Makai (ahtuk) hpe ndai ten hta rai nhpaw shi ai, mungdan ting gap hkat jahkring sign lu htu shangut ai hpang she aten masa hpe yu nna hpaila tam nna hpaw dat na hku rai nga malu ai. Ya pyi gaw Aung Minn wa hpai gumlet hkawm ai nau na wa ai majaw dai MAKAI (ahtuk) nau nchyip wa sam sai, loi li manam hkrang pru wa magang sai. Gasat ra ai maigan hpyen nnga ai re raitim 25/02/2014 ya shani Mikhtila mare makau kaw galaw ai myen asuya a hpyen shaman shakyang lamang gaw Rawt Malan hpung ni hpe mungmasa hte hparan na malai hpyen masa hte ginchyum dat shakre kau na ngu ai masing nan rai nga malu ai. Mungdan ting gap hkat jahkring sign htu ngut ai hpang mungmasa jahta nhkrum hkraw jang, 2008 constitution a kata de nlu gang bang la jang, dai MAKAI (ahtuk) kata kawn Minn Aung Hlaing pru wa na ra ai.
Ndai hte seng nna tsaw ra ai laika hti shawa masha hkawp myit su kaji kaba ni hpe teng byin ai mabyin langai mi hte la’kap nna garan gachyan mayu ai re. Lai wa sai 1971, 72 ning daram hta re, dai ten hta lahta sam mung hpe laidi nna Thai mungdan kaw na sinat laknak ni sa hpai la garum ai kaw na du wa ai VDF gyijum (xxx) gaw lam lapran kaw byin ai mabyin ni ngai hpe wa tsun dan ai. Gahtawng langai mi kaw du ai shaloi nta langai mi kaw shanhte shadu gun ai shat wa jawm sha na matu SHAT SHA HPAWNG GA’ANG KAW hpyenla langai mi HKYI MAKAI hpaw dat ai majaw dai wa hpe yawng jawm htawng matsut tawn ga ai nga nna ngai hpe wa tsun dan yu ai. Manang ni yawng masin loi kawp mat ai hpang dai hpyenla wa hpe atsawm san yu yang dai hpyenla wa ndai hku tsun ai da.. e.. ngai mung Balawng num ni malap da ai LENGHPUN MAKAI rai na re ngu nna hpunpawt langai mi kaw taw nga ai MAKAI hpe atsawm sha hta gun nna nanhte myitrum ni yawng hte shat sha ai shaloi yawng hpe jaw sha mayu ai majaw re law nga nna bai tsun tawngban wu ai da.
Dai hte maren daini Aung Minn wa shakut ningwan hkawm nga ai mungdan ting gap hkat jahkring sign htu lamang mung dai SHAT SHA HPAWNG GA’ANG KAW NA HKYI MAKAI hte bung wa na masa nga ai. Dai majaw Aung Minn wa hpai ya ai MAKAI kata kaw gaw HKYI (Minn Aung Hlaing) wa rawng taw nga ai re hpe dum ga. Yawng jawm htawng matsut kau na matu jin jin hkyen tawn ga.
By-Sau Nan Du
JPKS link
