Gap na mi rai rai, jahta na mi rai rai, anhte laga myu bawsang ni n-gun kaba ai Wuhpung byin hkra naw shawng gahkyin gumdin ai lam naw shawng galaw ra sai anhte laknak lang Rawt Malan taw nga ai myu bawsang ni myit hkrum gahkyin gumdin ai lam nlu shi ai kaw myen asuya hte sa hkrum hkrum rai jang gaw grau dumbru dumbra byin wa na masa nga ai.
Myen hpyen asuya a hpyendap hpe gashadawn hku tsun ga nga yang kujinjai hte shabung nna mung mai tsun nga ai. Ga kata kaw ganaw rawng taw nga ai kujinjai hpe gang htingnut shapraw nmai ai, shi hkum sha di mat hkam na re.
Dai hte maren Anhte laga myu bawsang ni a Mungdaw kata de ganaw bang tawn da ai myen hpyendap ni hpe myen asuya kawn galoi mung htingnut dawmla na nre. Majan sum nna si yang si hkam mat na ngu ai masa hku rai malu ai. Dai majaw myen hpyendap (kujinjai) hpe gaw ga hte hpawn kapaw shamawng kau yang sha mai na masa nga ai.
Laknak Rawt Malan Wuhpung ni myen asuya hte saboi ntsa e galoi du hkra gade daram bawngban tim MADU UP HKANG AI MUNGDAW ngu ai hpe jaw na masa nnga ai. MADU UP HKANG AI GINRA ngu ai ga baw sha tsun masat masu nna matut dip sha mat wa mayu ai masa re. Ga shadawn…
UWSA ni gap di la tawn ai lamu ga hpe Wa myu sha ni a madu up hkang ai mungdaw ngu nna ntsun masat ya lu ai, UWSP/UWSA ni a uphkang ginra ngu ai ga baw hku sha tsun masat ai.
Dik nna anhte Wunpawng Mungdan Shanglawt Asuya KIO/KIA ni Kachin State hpe gap di la tawn tim pyi gaw myen asuya hku nna Kachin myu sha ni a MADU UP HKANG AI MUNGDAW ngu ai ga baw pyi tsun na nre, KIO/KIA ni a UP HKANG AI GINRA ngu ga baw hku sha tsun masat chyalu sha re.
Lachyum gaw, Madu up hkang ai mungdaw ngu ai shingteng amying hte ahkaw ahkang jaw kau ai hpang gaw shanhte myen asuya ni htim gasat mung nmai mat sai, kam mara roi sha mung nmai mat sai. Ginra ngu ai shingteng amying ga baw hpe gaw… gadai uphkang ai ginra mi rai rai shanhte myen asuya ni aten ntam ai aten nlata ai naw htim gasat zing madu la mayu masa re. Myen asuya hte jahta jahkrup bawngban nna lata lahpan mi daram sha pa ai mungdaw pyi lu mai na masa nnga ai.
Myen asuya hpe federal munghpawm jawm gawgap ga ngu tsun aput taw nga yang gaw shanhte a myit hta shanhte hpe ja lahkum tingnyang kawn le kawa wahpang lapran de gumhtawn chyat rawng shangun ai zawn nga hkam sha na ma ai. Shanhte mung mungdan langai mi hku nna sha gaw nga mayu chyalu sha re. Myen asuya ni mung mungdan langai mi hku nga, Anhte laga myu bawsang ni mung Jet ai munghpawm mungdan Federal langai mi jawm gawgap nna nga re ai lam gaw mai kaja ai hte jaw dik ai yaw shada lam rai na re. Anhte laga myu bawsang ni a kata kaw gaw Mungdaw States 10,20 byin pru wa tim hpa manghkang nnga ai, rau jawm nga mai ai. Ahkyak madung gaw myen hte rau nnga na sha ahkyak re.
Sau Nan Du
By-jpks
