Kamhpa Ai

Myitrum manang ni, “ Kamhpa Ai ” ngu ai Ga shagawp ka shagun dat ai yaw. Daini na shiga gaw, loi mi hpang hkrat mat sai re. 13.10.2012 shana de sha, Manmaw lam Bumsawn majan shawnglam Hpa-awn, Du Jum Ntang Tang Ja ngu ai wa, madu jan ma shangai na re majaw, LZ gan du wa ai shaloi, “ Chyeju shakawn ga” nga, wa tsun dan ai shiga re. 21.9.2012 shani Bumsawn pungding M post de M hpyenla 200 jan yan kaput lung wa ai hpe, KIA hpyenla marai 13 hte sha KRL hte hkap shakrip ai; M hpyenla ni grai law hkra si rum mat ai,KIA ni marai mi pyi n hkala ai; di hangkaw langai sha waw mat ai da. Dai zawn gasat hkat nga ai shaloi, M ni gaw Bumsawn pungding post, Hkangkai post, kaga post2, yawng post 4 ting kaw na myawk gap bun ai raitim, dai myawk si ni mung KIA ni kaw n hkra ai da. Dai ten nbungli 2 mung 2 lang wa pyen gayin hkawm ai raitim, M hte KIA hpe n chye ginhka ai majaw rai sam ai; bom langai mi pyi n jahkrat bun ai yu mat wa ma ai shiga re. Ndai mung anhte akyu jawm hpyi ai sakse mahtai langai rai sai; Chyeju shakawn nhtawm matut nna KK bau sin makawp maga la rit ga akyu hpyi dingyang arai nga ga lu oi. M ni gaw pungding post kaw myawk kaba wa shadun na matu myawk ni hpai lung wa ma ai raitim myit ai kaw n du mat manu ai da yaw.

     Kam hpa ai; JIC

------------------------------

Kamhpa Ai

---------------------

Tsawra kamhpa ai,
Share Ninghkring tai;
Nde nlaw majan,
N hkring n sa she an;
Galai manang kata,
Mangai marang abya;
Shingran shagu dum,
Kraw kata n lum;
Share ni hpe majen,
Kyu hpyi nhtoi dingren;
Yehowa kaw hkrang,
Iya kyu hpyi atsang;
Majan hkat shagu dang,
Si garai ai Tai mang;
Share Ninghkring ai,
Hpa rai grai byin tai?
Laknak grung n rai,
Masha n byin tai;
Myu tsaw ai hpyenla,
Mung tsaw ai Du wa;
Ka-ni ya mi raitim,
Myu tsaw myit gaw n sim;
Chyaru nang ai Du wa,
Mungtsaw myit gaw kaja;
Tai ni kade she law,
Myu tsaw myit gaw grai taw;
Lawhpa myit hte htim lung,
Mungkan majoi hkyet-rung;
Shakre la na rai sai,
Awmdawm shanglawt lu mai;
Share Ninghkring shaja,
Karai bau sin u ga;
Kyu hpyi na hkum malap,
Ngai byin ngu – hkum kadap;
Kamhpa share Ninghkring,
Tsawra hkungga myit hpring;
Tsin- yam ni a lashyum,
Hpyen-yen ni a salum;
Jawngma ni a kasi,
Kani ni a kahkri;
Myusha ni a n- gun,
Awmdawm shingran shangun;
Mungdan Shanglawt lu hkra,
Kamhpa ai lu yaw ya………

Shanglawt Tsing