Sam hte Jinghpaw gaw kahpu kanau ngu tim nshut ai, dai rai yang garum madi shadaw hkat na matu mung lahkawng maga jin jin rai ra ai. Sam myu sha ni myit nsu yang anhte Jinghpaw a matu lam shagu hta ahtu hkra shangun chye ai zawn, anhte Jinghpaw ni a myit masin hta Sam myu sha ni gaw anhte a kahpu kanau re ngu hpe galoi mung chye na hkawn hkrang nga chya-lu re.
Dai ni ndai aten hta Sam myu sha ni sung sung li li myit mang chye ra ai aten re, Jinghpaw mung kaw nga ai Sam ni gaw Jinghpaw mung hpe makawp maga garum na lit nga ai. Dai hte maren Sam mung kaw nga ai Jinghpaw ni mung Sam myu sha ni hpe adip arip galaw wa yang pawn ba hkat na matu myit masin jin jin rai nga ai. Sam amyu sha ni hta mung masa hpaji kung kyang ai ni law law, hpaji machye machyang nga ai ni law law rai ma ai, dai rai yang ndai lam hpe anhte lak san naw tsun shaga hkat ra na kun?
Ya ndai aten hta anhte Jinghpaw Wunpawng mung dan kata e hpabaw byin nga ai hpe Sam myu sha ni myi n-pu e mu nga chyalu re, kaga lak san tsun sang lang dan na lam n-nga ai. Sam myu sha ni hte Jinghpaw myu sha ni a tai hpyen gaw gadai rai nga ai kun? Ngu ai hpe mung lahkawng yan asan pra chye nga chyalu re. Dai hpe Hpunau Sam myu sha ni a mung masa ninghkring ni hpaji kung kyang ai ni ading tawk tsun hparan kau chye ra ai. Lama wa Sam mung dan hte Sam myu sha ni a matu shim lam raw a yang Jinghpaw myu sha ni gade ram garum lai wa sai mung labau shang nan nga nga ai. Dai hpe Sam myu sha ni myit dum ra ai. Jinghpaw mung na Sam ni shang lawt hpyen la la ra jang Sam mung na Jinghpaw ni Sam hpyen la galaw na nga tim jin jin rai nga ai.
Shinggyim ahkaw ahkang (Human Rights) ngu ai gaw shinggyim masha hkum shagu hta shangai wa ai kaw nna nga chyalu rai nga ai, dai ahkaw ahkang hta hkan nna tsun shaga ai lam hta anhte Jinghpaw Wunpawng myu sha ni chye na chyalu rai ga ai. Rai yang anhte Sam myu sha ni hte Jinghpaw Wunpawng myu sha ni a kahpu kanau ganawn mazum lam hta dai ahkaw ahkang ni hpe hkungga hkat ra ai zawn, dai ahkaw ahkang ni hta grau tsaw ai ganawn mazum lam, mung masa mahkri shawn lam, mung dan hte myu sha shim lam hpe lahkawng maga sung sung li li myit mang na grai ahkyak nga ai.
Ndai lahta na lam ni hpe hpu nau Sam myu sha ni hpe myit dum shangun mayu ai.
Hpu nau Sam myu sha ni hpe tsawra hkungga let
Kachin Politics Watch and Research Network
By James Alex
