Wunpawng Mungdan Shanglawt Hpung a pandung shadaw rai nga ai awm dawm nna shadip jahpang lu ai Wunpawng Gumrawng Gumtsa Mungdan gaw sharawt sa wa ai lam hta Mungchying Uphkang lam gaw ahkyak kaba ai daw langai rai nga ai.
Grau nna Wunpawng Mungdan Shanglawt Hpung a N-pawt N-hpang Tara Kanu ni hpe hkrang shapraw sa wa ai lam hta Mung-chying Uphkang Dap gaw, Wunpawng Mungdan Shanglawt hpung a lakung lakap langai rai nga ai.
Dai majaw Mungchying Uphkang Dap gaw, hpaw da ai lam hpe aja awa maju jung ai hte htep lahti hpajang woi jasat galawt sa wa ra ai.
(1) Mungching Uphkang Dap gaw, Wunpawng Mungdan Shanglawt Hpung a Mungmasa lam yan hpe hkrang shapraw sa wa ai Magam Dap langai rai nga ai.
(2) Mungchying Uphkang Dap hta, Wunpawng Mungdan Shanglawt Hpung hpe tsang hte tsang hpaw da na. Magam Dap Ginjaw Rung Kaw nna Ginwang Rung madang du hkra tsang hte tsang Hpung Komiti hpaw da n-htawm, lawu tsang de Hpung Komiti lakung lakying ni hpaw da na.
(3) Mungchying Uphkang Dap tsang hte tsang shagu hta Komiti Hpawng Chyawm Woi Awn Masa hpe lang na.
(4) Mungchying Uphkang Dap magam gun masha shagu gaw, Wunpawng Mungdan Shanglawt Hpung a Mungmasa lam yan hpe a san a pra chye na ai hkrai rai ra ai hte Mungshawa hpawng chyawm hta dai shanglawt masa lam yan masa gat hkai ai masha ni rai ra na.
(5) Mungching Uphkang Dap gaw, Mungshawa hpawng hta (Dimokresi) ahkaw ahkang hpring tsup ai hku nga wa hkra Wunpawng Mungshawa hpe lam woi myi jahpaw ya sa wa na.
(6) Mungchying Uphkang Dap gaw, Mungshawa a galaw lu/sha lam hte nga sat/sa lam hta shim lam hte Tara rap ra lam nga hkra up hkang sa wa na.
(7) Mungchying Uphkang Dap gaw, Wunpawng Mungshawa a galu kaba kung hpan lam hte sut lu nga mai lam hpe aja awa woi awn sharawt sa wa na.
(8) Mungching Uphkang Dap gaw, mungshawa up hkang lam hta Gumrawng Gumtsa Uphkang Lailen hpe tsaw htum ai kasi kamang shatai la nga na hte mungshawa hpe Gumrawng Gumtsa Uphkang Lailen chye lang wa hkra hpaji jaw shaman
shakyang ya sa wa na.
Daw (13 ) de bai matut na
